რამდენიმე კრიპტო ბირჟამ რუსი მომხმარებლები დაბლოკა

რამდენიმე კრიპტო ბირჟამ რუსი მომხმარებლები დაბლოკა 

 შეერთებული შტატებისა და ევროკავშირის სანქციების შედეგად, რუს კრიპტო ინვესტორებს რიგ კრიპტო ბირჟებზე ოპერაციების განხორციელებასა და პირად ანგარიშებზე წვდომაზე შეზღუდვები შეექმნათ.

ამერიკულმა ბირჟამ Coinbase რუსეთში კრიპტოვალუტების ტრანზაქციები შეაჩერა.

ბირჟის წარმომადგენლის განცხადებით, კომპანია გლობალურ სადამკვირვებლო სიებს მუდმივ რეჟიმში ამოწმებს და საეჭვო IP მისამართებს ბლოკავს :

„ ჩაშენებული KYC პროტოკოლების ფარგლებში ჩვენ  სანქცირებულ შემოწმებას ვატარებთ.

ასევე ვახორციელებთ გლობალური სადამკვირვებლო სიების მათი განახლების შესაბამისად რეგულარულ შემოწმებას,

ისევე როგორც აკრძალული იურისდიქციებიდან მოწოდებული IP მისამართების შესაბამისი სერვისების მონიტორინგსა და ბლოკირებას.

ვიყენებთ სხვა ტექნიკურ სისტემებს, რათა თავიდან ავიცილოთ ტრანზაქციები, რომლებიც იდენტიფიცირებული სანქცირებული ფიზიკური პირების ან სუბიექტების მისამართებთან არის დაკავშირებული.“

მსგავსი განცხადებები რამდენიმე სხვა კრიპტოვალუტის პლატფორმამაც გააკეთა: KUNA, BTC-Alpha და CEX IO-მა. განცხადებები  ბირჟების ტელეგრამის ჯგუფებში ან კომპანიის წარმომადგენლების პირად ტელეგრამ ექაუნთებზე გამოქვეყნდა.

„ რუსეთის მოქალაქეებისთვის  პლატფორმის მუშაობას ვაჩერებთ.

მანამ, სანამ უკრაინაში ვითარება არ დასტაბილურდება. ყველა სხვა მომხმარებლისთვის პლატფორმა  ჩვეულ რეჟიმში იმუშავებს.“- ნათქვამია BTC-Alpha-ს გვერდზე.

პლატფორმა CEX IO-ის განცხადებით, 2022 წლის 26 თებერვლიდან რუსული  რუბლი მიუწვდომელი იქნება ვაჭრობისთვის, დეპოზიტებისა და სესხებისთვის და რუსული რუბლის ყველა აქტიური შეკვეთა ავტომატურად გაუქმდება.

კრიპტო ბირჟა KUNA-ს დამფუძნებელმა, მიხაილ ჩობანიანმა  თავისი ტელეგრამის არხზე გამოაქვეყნა განცხადება რუბლის ყველა წყვილის გამორთვის, ასევე ბირჟიდან რუსული რუბლის შეტანისა და გამოტანის შეწყვეტის შესახებ.

კრიპტოვალუტის საერთაშორისო ბირჟებმა რუსეთის ანგარიშებსა და ფინანსურ ტრანზაქციებზე დროებითი აკრძალვები  მას შემდეგ დააწესეს, რაც გაჩნდა ვარაუდი, რომ კრიპტოვალუტები შესაძლოა სანქციების გვერდის ავლის საშუალება იყოს.