რატომ არ ღირს USDT-ს იმედად ყოფნა
Binance-ის აღმასრულებელმა დირექტორმა ჩენპენ ჯაომ ინვესტორებს ურჩია, მსხვილი სტაბილური კრიპტოვალუტებით არ შემოიფარგლონ და რისკების დივერსიფიკაციისთვის ყურადღება უფრო მცირე ალგორითმულ სტეიბლკოინებზე გაამახვილონ.
Ask Me Anything (AMA) სესიის ფარგლებში, ჩენპენ ჯაომ (Changpeng Zhao) ამჟამად საბაზრო კაპიტალიზაციის მიხედვით ყველაზე მსხვილ სტეიბლკოინზე Tether-ის USDT-ზე ისაუბრა. ჯაომ აღნიშნა, რომ ამ კრიპტოვალუტის მიმართ გამჭვირვალობის ნაკლებობის გამო ნაკლები ნდობა აქვს:
„პირადად მე USDT-ს აუდიტის ანგარიში არასდროს მინახავს. ვფიქრობ, ისევე როგორც მომხმარებლების უმეტესობას. ასე რომ, ეს ერთგვარი შავი ყუთია, რადგან ჩვენ არაფერი ვიცით “- აღნიშნა ჯაომ.
ჯაოს თქმით, კარგად რეგულირებად და საიმედოდ შემოწმებულ სტაბილურ მონეტებსაც კი, როგორიცაა მაგალითად BUSD, გაუთვალისწინებელი რისკები მაინც ახლავს. ამიტომ, ინვესტორებმა ყურადღება სხვადასხვა ალგორითმულ სტეიბლკოინებს უნდა მიაქციონ და ყველაზე პოპულარულ გიგანტებს არ ჩააცივდნენ.
წლის დასაწყისში BUSD-ის კაპიტალიზაცია 5 მილიარდი დოლარით დაეცა, რადგან ნიუ-იორკის სახელმწიფო ფინანსური სერვისების დეპარტამენტმა (NYDFS) უსაფრთხოების მოთხოვნების დარღვევის გამო კომპანია Paxos Trust-ისგან ახალი BUSD-ის გამოშვების შეწყვეტა მოითხოვა.
„რაც შეიძლება მეტ სტეიბლკოინთან უნდა ვიმუშაოთ. არ არის საჭირო რომელიმე კრიპტო აქტივზე ფსონის დადება. ჩვენ გვყავს მცირე გუნდი, რომელიც სხვადასხვა ადგილას ალგორითმულ სტეიბლკოინებზე მუშაობს. ასეთ სტეიბლკოინებს არ გააჩნიათ დიდი მასშტაბები, სამაგიეროდ ადგილობრივად ძალიან აქტუალურია.“- განაცხადა ჯაომ.
ცოტა ხნის წინ, Binance-ის ხელმძღვანელმა საკუთარ თავს ბიტკოინის აქტიური მხარდამჭერი უწოდა. მან კვლავ წამოწია დეცენტრალიზაციის თემა და განაცხადა, რომ Binance მზად არის სხვადასხვა ბლოკჩეინებსა და კრიპტოვალუტებს მხარი დაუჭიროს.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)