რატომ დათმო პოზიციები ციფრულმა ლარმა და იუანმა?

ცენტრალური ბანკის ციფრული ვალუტები სტეიბლკოინებთან ბრძოლაში დამარცხდნენ

მსოფლიოში უდიდესი კრიპტო ბირჟის, Binance-ის ყოფილმა აღმასრულებელმა დირექტორმა, ჩენპენ ჯაომ, ტოკიოში გამართულ WebX-ის კონფერენციაზე განაცხადა, რომ სტაბილური კრიპტოვალუტების დაჩქარებული განვითარების გამო, ცენტრალური ბანკის ციფრული ვალუტები უკვე უსარგებლო ხდება.

როგორც ჯაომ აღნიშნა, გლობალურ ბაზარზე სტეიბლკოინების ცენტრალური ბანკის ციფრულ ვალუტებზე (CBDC) დომინირება იმით აიხსნება, რომ ისინი ფულადი გზავნილებისა და საერთაშორისო ანგარიშსწორებისთვის გაცილებით ხშირად გამოიყენება.

ზოგიერთმა ცენტრალურმა ბანკმა საკუთარი ციფრული ვალუტის შესაძლებლობების შესწავლა 2013 წელს დაიწყო და მათთან ექსპერიმენტები 2020 წლამდე გაგრძელდა. თუმცა, ჯაომ ხაზი გაუსვა, რომ მინიმუმ 10 ქვეყანამ უკვე შეაჩერა CBDC-ების ტესტირების საპილოტე პროექტები მათზე მოთხოვნის ნაკლებობის გამო. ჯაოს თქმით, დანერგვის საბოლოო ეტაპამდე მიღწევა მხოლოდ რამდენიმე CBDC-მ მოახერხა, ესენია : ბაჰამური Sand Dollar, ნიგერიული ელექტრონული eNaira და განას eCedi.

ამასთან, ბევრი ქვეყანა ციფრული სტაბილური კრიპტოვალუტების მიმართ საკუთარი პოზიციის შეცვლას და მათთვის მარეგულირებელი ჩარჩოს შექმნას იწყებს. ამ ზაფხულს აშშ-ის პრეზიდენტმა დონალდ ტრამპმა ხელი მოაწერა Genius-ის აქტს, რომელიც სტაბილური კრიპტოვალუტების გამოშვებას და მიმოქცევას არეგულირებს. ივნისში ჰონგ-კონგის სავალუტო ორგანომ (HKMA) ჰონგ-კონგის დოლართან მიბმული სტაბილური კრიპტოვალუტების ემიტენტების მოთხოვნები დააზუსტა.

„ცენტრალური ბანკის ციფრული ვალუტები მათ უფრო ძლიერ კონკურენტებთან, სტაბილურ კრიპტოვალუტებთან შედარებით უკვე მოძველებულია. ამჟამად სწორად ისინი იპყრობენ მომხმარებლების ყურადღებას. სტაბილურ კრიპტოვალუტებს ფართო ბაზარზე დანერგვის მეტი შანსი აქვთ, რადგან მათ რეალური უზრუნველყოფა გააჩნიათ“- განაცხადა ჯაომ.

იუანით მხარდაჭერილი სტაბილური კრიპტოვალუტის შექმნის შესაძლებლობის შესწავლა ცოტა ხნის წინ ჩინეთის მთავრობამ დაიწყო, რათა დოლარზე მხარდაჭერილი სტეიბლკოინების ჰეგემონიას დაუპირისპირდეს. მიუხედავად იმისა, რომ კრიპტოვალუტით ვაჭრობა და მაინინგი ჩინეთში 2021 წლიდან აკრძალულია, ეროვნული ვალუტის პოზიციების გასაძლიერებლად ხელისუფლება მზადაა სტაბილური კრიპტოვალუტების შესაძლებლობები შეისწავლოს.