სამხრეთ კორეამ ჩრდილოეთ კორეელი ჰაკერების წინააღმდეგ სანქციები დააწესა

სამხრეთ კორეამ ჩრდილოეთ კორეელი ჰაკერების წინააღმდეგ სანქციები დააწესა

კორეის რესპუბლიკის მთავრობამ ჩრდილოეთ კორეის ოთხი მოქალაქე და შვიდი ორგანიზაცია შავ სიაში შეიყვანა.

სამხრეთის ხელისუფლების განცხადებით, მათი საქმიანობა კრიპტოაქტივების ქურდობასთან არის დაკავშირებული.

სეულის სანქციები მიმართულია იმ პირთა წინააღმდეგ, რომლებიც ორგანიზაცია Lazarus-სთან კავშირში არიან ეჭვმიტანილი.

მათ შორის ვისაც სანქციები შეეხო არის კომპანია Chosun Expo-ს  ხელმძღვანელი პაკ ჯინ-ჰიოკი (Park Jin-hyeok).

ვარაუდობენ, რომ კომპანიის უკან ორგანიზაცია Lazarus-ი დგას.

„ეს სამხრეთ კორეის მთავრობის მხრიდან  კიბერუსაფრთხოების სფეროში ჩრდილოეთ კორეის წინააღმდეგ მიღებული პირველი სანქციებია. ვიმედოვნებთ, რომ ის, რაც ხდება, მსოფლიოსთვის ჩრდილოეთ კორეასთან ვირტუალური აქტივებით ვაჭრობის რისკებთან დაკავშირებული გაფრთხილება იქნება.“ – განაცხადა სამხრეთ კორეის საგარეო საქმეთა სამინისტრომ.

თებერვლის დასაწყისში გაერთიანებული ერების ორგანიზაციამ თავის მოხსენებაში აღნიშნა, რომ 2022 წელს ჩრდილოეთ კორეელმა ჰაკერებმა სხვა წლებთან შედარებით ყველაზე მეტი კრიპტო აქტივი მოიპარეს.

გაეროს ანალიტიკოსების მიერ დადგინდა, რომ გასულ წელს უცხოურ საჰაერო კოსმოსურ და თავდაცვის ქსელებზე კიბერ თავდასხმების შედეგად, კორეელმა ჰაკერებმა სავარაუდოდ 630 მილიონი დოლარიდან 1 მილიარდ დოლარამდე კრიპტო აქტივები მოიპარეს.

გაეროს ექსპერტების განცხადებით,  ჩრდილოეთ კორეელი ჰაკერები აქტივების მოსაპარად სულ უფრო გამჭრიახ სქემებს მიმართავენ, რის გამოც მოპარული კრიპტო აქტივების კვალის მოძებნა  გაცილებით გართულდა.

იანვარში აშშ-ს გამოძიების ფედერალურმა ბიურომ განაცხადა, რომ Lazarus-ი გასულ წელს მომხდარ ქსელთაშორის ხიდ Harmony One-ზე მასშტაბურ კიბერ თავდასხმაში მონაწილეობდა.

ტრანზაქციების ანონიმიზაციის პროტოკოლ RAILGUN -ის მეშვეობით ჰაკერებმა დაახლოებით 60 მილიონი დოლარის მოპარული აქტივების Ethereum-ზე გადაცვლა შეძლეს.

მოპარული თანხების ნაწილის გაყინვა კრიპტობირჟების Binance-ისა და Huobi-ის  ძალისხმევის შედეგად მოხერხდა.