სანქციების გამო ბიტკოინს დოლარზე უპირატესობა ექნება

სანქციების გამო ბიტკოინს დოლარზე უპირატესობა ექნება

 კრიპტოვალუტის ბირჟა BitMEX-ის თანადამფუძნებლის აზრით, რუსეთის წინააღმდეგ მიღებულ სანქციებთან დაკავშირებით ბიტკოინი ოქროსა და აშშ დოლარზე უპირატესობას მოიპოვებს.

არტურ ჰეისმა (Arthur Hayes) გამოაქვეყნა სტატია, რომელიც  საერთაშორისო ფინანსური სისტემის მიმდინარე დინამიკის ცვლილებას ასახავს.

BitMEX-ის თანადამფუძნებლის თქმით, რუსეთისა და სხვა ქვეყნების წინააღმდეგ სანქციები მათ მოქალაქეებს ხელს უწყობს ინვესტირება ოქროსა და ბიტკოინში მოახდინონ და ფული დოლარში არ შეინახონ.

ჰეისის განმარტებით, რთულ ეკონომიკურ ვითარებაში, მოქალაქეები მეტ ნდობას შეზღუდული მარაგის მქონე აქტივების მიმართ იჩენენ, რადგან მათ ფულის დაზოგვის უფრო საიმედო საშუალებად მიიჩნევენ.

ჰეისი თვლის, რომ რუსეთის SWIFT-ის საერთაშორისო საგადახდო სისტემიდან გათიშვას, ანუ ენერგეტიკის სფეროს ერთ-ერთი ლიდერის იზოლაციას, შესაძლოა გლობალური ფინანსური სისტემისთვის გრძელვადიანი უარყოფითი შედეგები მოჰყვეს.

BitMEX-ის თანადამფუძნებლის თქმით, SWIFT სისტემა, რომელიც ახლა  ეკონომიკური ომის საწარმოებლად გამოიყენება, შესაძლოა დასრულდეს, ხოლო ოქრო და ბიტკოინი მომავალშიც განვითარებას ჰპოვებს.

გარკვეული პერიოდის განმავლობაში, ოქრო დომინანტური აქტივი გახდება, რადგან ის ენერგეტიკისა და საკვები პროდუქტებით საერთაშორისო ვაჭრობისთვის იქნება გამოყენებული.

„ იმისდა მიუხედავად, 1 სატოში გექნებათ თუ 1000 ბიტკოინი, ყველაფერი რაც თქვენ გჭირდებათ არის საჯარო და პირადი გასაღები. ბიტკოინს წონა არ გააჩნია და მასზე წვდომა შესაძლებელია ყველგან, სადაც ინტერნეტია.

ოქროსთან შედარებით, ბიტკოინს შენახვისა და ტრანზაქციების თვალსაზრისით მეტი უპირატესობა აქვს.

გახსოვდეთ: იზრდება არა ოქროსა და ბიტკოინის ფასი, არამედ მცირდება იმ ფიატური ვალუტის ღირებულება, რომელშიც ისინია შეფასებული.“

ჰეისმა მაგალითად სალვადორი მოიყვანა, სადაც ბიტკოინი გასული შემოდგომიდან ლეგალური გადახდის საშუალება გახდა. ახლა ამ ექსპერიმენტს თვალს ბევრი სახელმწიფო ადევნებს.

ვარაუდობენ, რომ საბანკო სერვისებზე ცუდი წვდომის გამო, ბიტკოინის მიღებაში ლიდერობას ლათინური ამერიკის ქვეყნები გასწევენ.