სემ ბენკმენ-ფრიდმა ბრალი არ აღიარა

სემ ბენკმენ-ფრიდმა ბრალი არ აღიარა

3 იანვარს, მანჰეტენის ფედერალურ სასამართლოში FTX-ის ყოფილი ხელმძღვანელის სემ ბენკმენ-ფრიდის საქმის მორიგი მოსმენა გაიმართა. მან ბირჟის გაკოტრებასთან დაკავშირებით პროკურატურის მიერ წარდგენილი ბრალდებები უარყო.

მას შემდეგ, რაც Alameda-ს ყოფილმა აღმასრულებელმა დირექტორმა ქეროლაინ ელისონმა (Caroline Ellison) და FTX-ის ყოფილმა ტექნიკურმა დირექტორმა გერი ვენმა (Gary Wang) ბრალი აღიარეს და პროკურატურასთან თანამშრომლობის მზაობა გამოთქვეს, იყო მოლოდინი იმისა, რომ მათ სემ ბენკმენ-ფრიდიც (Sam Bankman-Fried) შეუერთდებოდა.

თუმცა, FTX-ის ყოფილმა აღმასრულებელმა დირექტორმა მის წინააღმდეგ წარდგენილი რვავე ბრალდება უარყო.

შეგახსენებთ, რომ ბენკმენ-ფრიდის წინააღმდეგ წარდგენილი ბრალდების რვა პუნქტიდან ხუთისთვის მაქსიმალური სასჯელი 20 წლით თავისუფლების აღკვეთაა.

სამშაბათს გამართულ მოსმენაზე აშშ-ს ფედერალური პროკურორის თანაშემწის დანიელ სასუნის (Danielle Sassoon) მიერ გაკეთებული განაცხადების თანახმად, მთავრობას ბენკმენ-ფრიდის წინააღმდეგ უამრავი მტკიცებულება აქვს.

ამ მტკიცებულებებს  პროკურორები უახლოეს მომავალში კიდევ ასობით ათას დოკუმენტს დაამატებენ.

სასუნის თქმით, მთავრობის მხრიდან გამოძიება და უფრო გაფართოებული ჩხრეკისთვის ორდერების მოპოვება ჯერ კიდევ მომდინარეობს.

საოლქო მოსამართლე ლუის კაპლანმა (Lewis Kaplan) შემდეგი სასამართლო პროცესი 2 ოქტომბერს დანიშნა.

მანამდე კი ცნობილი გახდა, რომ ბენკმენ-ფრიდი ამერიკელ მწერალსა და ჟურნალისტს, მაიკლ ლუისს (Michael Lewis) შეხვდა.

გავრცელებული ინფორმაციით ლუისი FTX-ის გარშემო განვითარებულ მოვლენებზე დაფუძნებული წიგნისა თუ სცენარისთვის ინფორმაციას აგროვებს.