სემ ბენკმენ-ფრიდს ბრალი თაღლითობაში წაუყენეს

სემ ბენკმენ-ფრიდს ბრალი თაღლითობაში წაუყენეს

მანჰეტენის ფედერალურმა პროკურატურამ FTX-ის დამფუძნებელს ბრალი თაღლითობასა და კლიენტების მილიარდობით დოლარის ოდენობით თანხების მითვისებაში წაუყენა.

ფედერალურმა პროკურორმა დემიან უილიამსმა (Damian Williams) სემ ბენკმენ-ფრიდს  ბრალი რვა დანაშაულისთვის წაუყენა, მათ შორის შეთქმულებისა და თაღლითობისთვის.

საბრალდებო დასკვნაში ნათქვამია, რომ ბიზნესმენი თავის პარტნიორებთან ერთად თაღლითურ შეთქმულებაში ჩაერთო,

რომელიც „FTX.com-ის მომხმარებლების დეპოზიტების მოტყუებით მითვისებასა და ამ დეპოზიტების გამოყენებით Alameda Research-ის ხარჯებისა და ვალების დაფარვას“ ითვალისწინებდა.

13 დეკემბერს ბენკმენ-ფრიდის საქმეს ფასიანი ქაღალდებისა და ბირჟების კომისიისა (SEC) და სასაქონლო ფიუჩერსების სავაჭრო კომისიის (CFTC) დასკვნებიც დაერთო.

SEC-მა FTX-ის ყოფილ ხელმძღვანელს ბრალი FTX Trading-ის ინვესტორების მოტყუების სქემის ორგანიზებაში წაუყენა, ხოლო CFTC-მა  სასამართლოს აშშ-ს სასაქონლო ბირჟების კანონის დარღვევისთვის სამართლებრივი შეფასება მოსთხოვა.

გამოძიებას ნიუ-იორკის სამხრეთ ოლქის პროკურატურის კომპლექსური თაღლითობისა და კიბერდანაშაულის განყოფილება წარმართავს.

შეგახსენებთ, რომ ბენკმენ-ფრიდი ბაჰამის ხელისუფლებამ ორშაბათს, 12 დეკემბერს, FTX-ის მიერ გაკოტრების შესახებ განცხადების შეტანიდან ერთი თვის შემდეგ, აშშ-ს მთავრობის მოთხოვნით დააკავა.