by Giorgi 
სტეიბლკოინებით ტრანზაქციების მოცულობამ 33 ტრილიონ დოლარს მიაღწია
Artemis Analytics-ის მონაცემებით, სტაბილური კრიპტოვალუტების ბაზარი გასულ წელს 72%-ით გაიზარდა და ტრანზაქციების მოცულობამ 33 ტრილიონ დოლარს მიაღწია. კომპანია ამ ზრდას აშშ-ის კანონმდებლობაში ცვლილებებს უკავშირებს, რამაც ბაზრის მონაწილეთა კრიპტოვალუტების მიმართ ნდობა გააძლიერა და როგორც კორპორატიულ, ასევე საცალო სექტორებში სტეიბლკოინების გამოყენების სტიმულირება მოახდინა.
USD Coin (USDC) და Tether (USDT) უდავო ლიდერებად რჩებიან. აქტივობის ძირითადი ნაწილი სწორედ ამ სტეიბლკოინებზე მოდის: USDC-ზე დაახლოებით 18.3 ტრილიონი დოლარის ტრანზაქცია, ხოლო USDT-ზე დაახლოებით 13.3 ტრილიონის.
CoinGecko-ს მონაცემებით, Tether-ის USDT-მ საბაზრო ღირებულების მიხედვით ყვეელაზე მსხვილი სტეიბლკოინის პოზიცია შეინარჩუნა. მისი მიწოდება 187 მილიარდ დოლარს გაუტოლდა. ეს მაჩვენებელი Circle-ის USDC-ის (75 მილიარდი დოლარი) მაჩვენებელზე ორჯერ მეტია.
Bloomberg-ის ანალიტიკოსების ვარაუდით, 2030 წლისთვის სტაბილური კრიპტოვალუტით ტრანზაქციების მოცულობა 56 ტრილიონ დოლარამდე გაიზრდება. ისინი ბაზრის განვითარების მთავარ მამოძრავებელ ფაქტორად აშშ-ის მიერ ივლისში მიღებულ GENIUS-ის აქტს ასახელებენ. კანონმა Tether-ის მსგავსი კომპანიები წაახალისა „ამერიკული ვერსიების“ სტეიბლკოინები გამოეშვათ, რამაც მსხვილი ინსტიტუტების ყურადღება მიიპყრო. ანალიტიკოსები სტაბილური კრიპტოვალუტების პოტენციურ ემიტენტებად Standard Chartered-ს, Walmart-სა და Amazon-ს ასახელებენ.
როგორც Bloomberg-ის ექსპერტები აღნიშნავენ, ახლა ტრანზაქციების უმეტესობა ტრადიციული ფინანსური ინფრასტრუქტურის და არა დეცენტრალიზებული პლატფორმების მეშვეობით ხორციელდება. ამ უკანასკნელის წილი მკვეთრად შემცირდა. სულ უფრო მეტი ადამიანი, განსაკუთრებით მაღალი ინფლაციისა და ეკონომიკური არასტაბილურობის მქონე ქვეყნებში, ციფრულ დოლარებს კაპიტალის შენარჩუნების ინსტრუმენტად იყენებს.
Artemis-ის თანადამფუძნებელი ენტონი იმი (Anthony Yim) მიიჩნევს, რომ სტეიბლკოინები ადამიანებს გლობალური არასტაბილურობის პირობებში დანაზოგის დაცვის მარტივ და ეფექტურ გზას სთავაზობენ. USDT სულ უფრო ხშირად გამოიყენება, როგორც ბიზნეს ანგარიშსწორების ინსტრუმენტი, გადახდის ან კაპიტალის დაგროვების საშუალება.
ახლახანს ვაიომინგი გახდა აშშ-ს პირველი შტატი, რომელმაც საკუთარი სტეიბლკოინი გამოუშვა. მთავრობის განცხადებით, Frontier Stable Token (FRNT) მუნიციპალური პროექტებისა და ადგილობრივი სკოლების დაფინანსების დამატებითი წყარო გახდება. თუმცა არც ისე დიდი ხნის წინ Financial Times-ის ანალიტიკოსები ამტკიცებდნენ, რომ სტეიბლკოინები ფართო საზოგადოებისთვის უცხოა და ჯერ არ გამხდარა ფულადი ტრანზაქციების უნივერსალური გადაწყვეტა.
სიახლეების გამოწერა
