by Giorgi 
სტეიბლკოინებით ტრანზაქციების 86% სანქციების გვერდის ავლას უკავშირდება
კომპანია TRM Labs-ის ანალიტიკოსების მონაცემებით, ბოლო ერთი წლის განმავლობაში სტეიბლკოინებით ტრანზაქციების ყოველთვიურმა მოცულობამ 1 ტრილიონ დოლარს არაერთხელ გადააჭარბა. უკანონო საქმიანობასთან დაკავშირებულ საფულეებზე სტაბილური კრიპტოვალუტების სახით 141 მილიარდი დოლარი ჩაირიცხა, რაც ხუთი წლის მანძილზე ყველაზე მაღალი მაჩვენებელია.
ექსპერტების თქმით, უკანონო კრიპტო ტრანზაქციების უმეტესობა ფინანსურ დანაშაულს უკავშირდება: ძირითადად, სანქციებისგან თავის არიდებასა და ფულის მასშტაბურ გათეთრებას. ყველაზე დიდი წილი – 86%- სანქციებთან დაკავშირებულ ტრანზაქციებს წარმოადგენს. მნიშვნელოვანი როლი შეზღუდვების მქონე საფულეებს, ბირჟებსა და გადახდის პლატფორმებს ერგებათ.
კვლევაში აღნიშნულია, რომ სტეიბლკოინების გამოყენების ხასიათი და მასშტაბები დანაშაულის ტიპის მიხედვით მნიშვნელოვნად განსხვავდება. ყირგიზული ქსელი A7 და მასთან დაკავშირებული სტრუქტურები, მათ შორის რუსული ბირჟები Garantex და Grinex, სტეიბლკოინებს არა მხოლოდ პირდაპირი გადახდებისთვის, არამედ შვილობილ კომპანიებს შორის შიდა ანგარიშსწორების ინფრასტრუქტურის სახითაც იყენებენ. ამ ქსელების გადაკვეთა ჩინეთთან, ირანთან, ჩრდილოეთ კორეასთან და ვენესუელასთან დაკავშირებულ ეკოსისტემებთან ხდება.
სტეიბლკოინები უკანონო საქონლისა და მომსახურების, მათ შორის ადამიანებით ვაჭრობის სფეროში დომინირებენ. თაღლითობის, გამოსასყიდის მოთხოვნისთვის განხორციელებული შეტევებისა და ჰაკერული შეტევების დროს მათ შერჩევით იყენებენ – საწყის ეტაპებზე, უფრო ხშირად ბიტკოინი ან სხვა აქტივები გამოიყენება, ხოლო სტეიბლკოინები საქმეში მაშინ ერთვება, როცა საქმე ფულის გათეთრების ფაზაში შედის.
აკრძალული ნივთიერებების სეგმენტში, სტაბილური კრიპტოვალუტების გამოყენება ზომიერებას ინარჩუნებს. ამასთან, აღსანიშნავია, რომ არასრულწლოვნების მონაწილეობით უკანონო კონტენტის მიმოქცევაში, სტაბილური კრიპტოვალუტების წილი მინიმალურია.
ანალიტიკოსები აღნიშნავენ, რომ ფულის გათეთრების ძირითად არხებს გარანტირებული და ესქრო სერვისები წარმოადგენენ – მათი ბრუნვის 99%-მდე სტაბილურ კრიპტოვალუტებშია დენომინირებული. საუბარია ისეთ პლატფორმებზე, როგორიცაა დიდ ბრიტანეთში დაფუძნებული Zedcex და Zedxion, რომლებიც სწრაფ გადარიცხვებს და დაბალ საკომისიოებს უზრუნველყოფენ.
2026 წლის იანვარში, ირანის ფინანსური ქსელების, მათ შორის ისლამური რევოლუციის გუშაგთა კორპუსის მომსახურებისთვის აშშ-ის უცხოური აქტივების კონტროლის ოფისმა (OFAC) ამ სერვისებს სანქციები დააკისრა.
სიახლეების გამოწერა
