სტეიბლკოინმა USDT საბაზრო კაპიტალიზაციის მნიშვნელოვანი ვარდნა განიცადა

სტეიბლკოინმა USDT საბაზრო კაპიტალიზაციის მნიშვნელოვანი ვარდნა განიცადა

კომპანიამ Tether 2022 წლის ნოემბერში კრიპტო ბირჟა FTX -ის ჩამოშლის შემდეგ საკუთარი სტეიბლკოინის – USDT-ს საბაზრო კაპიტალიზაციის ყველაზე დიდი ვარდნა დააფიქსირა.

კომპანია TradingView-ს მონაცემების მიხედვით, USDT-ის საბაზრო კაპიტალიზაცია 137,24 მილიარდი დოლარით, დაახლოებით 1,2%-ით დაეცა. მაშინ, როცა კრიპტოვალუტის ბირჟა FTX -ის დაშლის ფონზე, USDT-ის საბაზრო კაპიტალიზაცია 5,7%-ით დაეცა.

მიმდინარე კვირის ვარდნა 30 დეკემბერს ევროკავშირის კრიპტო აქტივების ბაზრების (MiCA) ახალი წესების ძალაში შესვლას მოჰყვა.

იმოქმედა ასევე იმ ფაქტორმაც, რომ რამდენიმე კრიპტო ბირჟამ რეგულირებასთან დაკავშირებული პრობლემების გამო USDT-ს დელისტინგის გადაწყვეტილება მიიღო.

ახალი რეგლამენტის მიხედვით, სტეიბლკოინების ყველა ემიტენტს ევროკავშირში ოპერირების მიზნით სპეციალური ლიცენზიის მიღება მოეთხოვება.

ამავდროულად, მცირე ემიტენტებს თავიანთი რეზერვების 30%-ის ევროკავშირის კომერციულ ბანკებში შენახვა, ხოლო უფრო მსხვილ ემიტენტებს, როგორიცაა Tether, რეზერვების 60%-ის შენარჩუნება მოეთხოვებათ.

დეცენტრალიზებული დაკრედიტების პლატფორმა WeFi-ს ხელმძღვანელის აგნე ლინგის (Agne Linge) თქმით, ამ მოთხოვნების დაკმაყოფილება Tether-ის მსგავსი მსხვილი ემიტენტებისთვის შესაძლოა ეკონომიკურად წამგებიანი იყოს.

Orderly Network-ის ექსპერტები მიიჩნევენ, რომ MiCA-ს გავლენა USDT-ზე გეოგრაფიულად შეზღუდული იქნება და სტეიბლკოინის გლობალურ დომინირებას ზიანს არ მიაყენებს.

მაგალითად, MiCA-ს წესები სტეიბლკოინების გამოყენებას ევროკავშირის ცენტრალიზებულ ბირჟებზე ზღუდავს, მაგრამ ტრეიდერებს USDT-ს შენახვა არაკასტოდიალურ საფულეებში კვლავაც შეუძლიათ.

ამ მოსაზრებას Bitblaze-ის ანალიტიკოსებიც იზიარებენ და აღნიშნავენ, რომ USDT სავაჭრო მოცულობის 80%-ზე მეტი კონცენტრირებულია აზიაში, სადაც სტეიბლკოინების ბაზარი კვლავაც ძლიერია და ამ ბაზარზე USDT-ს მნიშვნელოვანი როლი აქვს.

მანამდე, კომპანია Tether-მა განაცხადა, რომ ოქტომბრის დასაწყისში მსოფლიოში ყველაზე პოპულარული სტეიბლკოინ USDT-ს 109 მილიონზე მეტი მფლობელი იყო, რაც ეთერიუმის მფლობელთა რიცხვს (128 მილიონი) უახლოვდება.