by Giorgi 
ტრადიციული ჰეჯ-ფონდების 55% ფლობს კრიპტოვალუტებს
ალტერნატიული ინვესტიციების მართვის ასოციაციის (AIMA) მიერ კომპანია PwC-თან ერთად ჩატარებული კვლევის თანახმად, 2025 წელს ციფრულ აქტივებზე წვდომა ტრადიციული ჰეჯ-ფონდების 55%-ს აქვს, მაშინ, როცა 2024 წლის ანგარიშში ეს მაჩვენებელი 47%-ს შეადგენდა.
გამოკითხვაში მონაწილეობა მსოფლიოს მასშტაბით 122 კომპანიამ მიიღო, რომლებიც ჯამში 982 მილიარდი დოლარის აქტივებს მართავენ.
რესპონდენტთა უმეტესობას კრიპტოვალუტებზე თავიანთი პორტფელების მოკრძალებული წილი – 2%-ზე ნაკლები აქვთ გამოყოფილი. თუმცა, მათი 71% 2026 წელს ამ წილის გაზრდას გეგმავს.
გამოკითხუთა თითქმის ნახევარმა (47%) ციფრულ აქტივებში ინვესტიციების გაზრდის მიზეზად აშშ-ში სამართლებრივი გარემო დაასახელა, რომელიც დღითიდღე სულ უფრო ხელსაყრელი ხდება.
ჰეჯ-ფონდების 52% აქტივების ტოკენიზაციით და ბლოკჩეინზე დაფუძნებული გადაწყვეტილებებით არის დაინტერესებული. ჰეჯ-ფონდების მესამედი (33%) აქტიურად იყენებს ან იკვლევს ტოკენიზაციას. ამ სფეროსადმი ყველაზე დიდი ინტერესი აზიასა და ახლო აღმოსავლეთში შეინიშნება.
მცირე კომპანიები, რომელთა მართვაშიც 1 მილიარდ დოლარზე ნაკლებია, უფრო მეტად არიან დაინტერესებული ტოკენიზებული პროდუქტებით, ვიდრე მსხვილი აქტივების მფლობელები – 37% 24%-ის წინააღმდეგ.
გამოკითხულთა უმრავლესობა (55%) ელის, რომ ტოკენიზებული ფონდები მომდევნო ათი წლის განმავლობაში ტრადიციულ ფონდებთან ერთად განვითარდება, ხოლო გამოკითხვის მონაწილეთა 11% პროგნოზირებს, რომ ტრადიციული ფონდები ბაზარზე დომინირებას დიდი ხნის განმავლობაში შეინარჩუნებენ.
ცოტა ხნის წინ, Robinhood-ის აღმასრულებელმა დირექტორმა ვლად ტენევმა (Vlad Tenev) თავდაჯერებულად იწინასწარმეტყველა, რომ მომავალში ყველა ვაჭრობა ბლოკჩეინზე განხორციელდება და კრიპტოვალუტასა და ტრადიციულ ფინანსებს შორის ზღვარი გაქრება.
სიახლეების გამოწერა
