by Giorgi 
ტრამპის ადმინისტრაციამ თანამშრომლებს Polymarket-ზე ფსონების დადება აუკრძალა
ტრამპის ადმინისტრაციამ თეთრი სახლის თანამშრომლები გააფრთხილა, რომ თანამდებობის ბოროტად გამოყენება და პროგნოზების პლატფორმებზე Kalshi და Polymarket ფსონების დადება დაუშვებელია.
24 მარტს, მას შემდეგ, რაც ტრამპმა ირანზე ხუთდღიანი საჰაერო თავდასხმების შეჩერების შესახებ გამოაცხადა, თეთრი სახლის თანამშრომლებმა ელ.წერილი მიიღეს. ელ.წერილში საუბარი იყო სხვადასხვა მედია საშუალებების შეშფოთებაზე იმ ფაქტთან დაკავშირებით, რომ მთავრობის წარმომადგენლებს ფსონების დასადებად ინსაიდერული ინფორმაციის გამოყენება შეეძლოთ.
ამ კვირაში, აშშ-ის წარმომადგენელთა პალატის ფინანსური მომსახურების კომიტეტის წევრმა, დემოკრატმა კონგრესმენმა რიჩი ტორესმა (Ritchie Torres) სასაქონლო ფიუჩერსების სავაჭრო კომისიას (CFTC) Polymarket-ზე საეჭვო სავაჭრო აქტივობის დაუყოვნებლივ გამოძიება ოფიციალურად მოსთხოვა. საეჭვო აქტივობა 7 აპრილს, ტრამპის მიერ აშშ-სა და ირანს შორის ცეცხლის შეწყვეტის შესახებ განცხადების გასაჯაროებამდე რამდენიმე საათით ადრე დაფიქსირდა.
ტორესმა Polymarket-ზე „ახლადშექმნილი მისამართების“ შესახებ დაწერა, რომლებმაც ცეცხლის შეწყვეტის დღეს კონკრეტული და დროული ფსონები დადეს, მიუხედავად იმისა, რომ სავარაუდო ზავზე მიმანიშნებელი ინდიკატორები არ არსებობდა. ამ მისამართებმა რამდენიმე საათში ასობით ათასი დოლარის მოგება მოიტანეს. ტორესმა CFTC-ს, Polymarket-ის პლატფორმიდან საჭირო მონაცემების მიღების, მათი ანალიზის, მისამართებსა და ტრანზაქციების ისტორიას შორის კავშირების გამოვლენისკენ და შემდეგ გამოძიების შედეგების კონგრესისთვის მიეწოდებისკენ მოუწოდა.
„სავაჭრო აქტივობა იმ დროს მოხდა, როდესაც აშშ-ის პრეზიდენტის საჯარო რიტორიკა კონფლიქტის ესკალაციაზე მიუთითებდა და არა პირიქით. ნაკლებად სავარაუდოა, რომ ფსონები მხოლოდ საჯაროდ ხელმისაწვდომ ინფორმაციას ეფუძნებოდა. ეს სერიოზულ შეშფოთებას იწვევს, რომ შესაძლოა ბაზრის ზოგიერთ მონაწილეს გეოპოლიტიკური მოვლენის შესახებ მგრძნობიარე, არასაჯარო ინფორმაციაზე წვდომა ჰქონოდა.“ – წერს ტორესი.
თეთრი სახლის პრესმდივანმა, დევის ინგლმა (Davis Ingle) ადმინისტრაციის წარმომადგენლების მიერ მსგავს საქმიანობაში ჩართულობის შესახებ ნებისმიერ ბრალდებას უსაფუძვლო უწოდა. ის დარწმუნებულია, რომ ყველა ფედერალური თანამდებობის პირი, მათ შორის პრეზიდენტი, ვალდებულია დაიცვას ეთიკური სტანდარტები, რომლებიც ინსაიდერული ინფორმაციის პირადი ფინანსური სარგებლისთვის გამოყენებას კრძალავს. ინგლის თქმით, ტრამპი მხოლოდ ამერიკელი ხალხის ინტერესებით ხელმძღვანელობს.
წყარო: https://www.bbc.com/news/articles/cgld65x396go
სიახლეების გამოწერა
