ტრამპის განცხადებით კრიპტოვალუტებთან ომი დასრულებულია

ტრამპის განცხადებით კრიპტოვალუტებთან ომი დასრულებულია

აშშ-ს პრეზიდენტის დონალდ ტრამპის განცხადებით, მან კრიპტო კომპანიების წინააღმდეგ ჯო ბაიდენის ყოფილი ადმინისტრაციის მტრული ქმედებები დაასრულა. ტრამპმა პირობა დადო, რომ ხელოვნურ ინტელექტისა და კრიპტოვალუტის სფეროებში აშშ-ის ლიდერობას შეინარჩუნებს.

მაიამი-ბიჩში FII PRIORITY Summit-ზე გამოსვლისას, აშშ-ს პრეზიდენტმა კრიპტოვალუტების რეგულირებასთან დაკავშირებით ფასიანი ქაღალდებისა და ბირჟების კომისიის (SEC) მიდგომა გააკრიტიკა. ტრამპის თქმით, კრიპტო კომპანიებისა და მათი ხელმძღვანელების წინააღმდეგ მარეგულირებლის არაერთი ბრალდება უსაფუძვლო და პოლიტიკურად მოტივირებული იყო.

ტრამპმა გაიხსენა, რომ იანვრის ბოლოს მან ხელი მოაწერა ბრძანებას კრიპტო ინდუსტრიის განვითარების შესახებ, რომელიც კონფიდენციალურობის მიზეზით ასევე ციფრული დოლარის შექმნას კრძალავს.

ამერიკელმა ლიდერმა ხაზგასმით აღნიშნა, რომ ეს ინიციატივა შეერთებულ შტატებს ახალი ტექნოლოგიების განვითარებაში ლიდერობის შენარჩუნებისა და ჯო ბაიდენის დროს დაწყებული ინდუსტრიული კომპანიების დევნის შეჩერების შესაძლებლობას მისცემს.

„პოლიტიკური მიზეზების გამო არაფერს ვაკეთებ, მხოლოდ იმას ვაკეთებ, რაც სწორია. მინდა, რომ აშშ ყველა ინდუსტრიაში წინა პლანზე იყოს. ამ ბრძანებებს ხელი იმისთვის მოვაწერე, რომ ბიტკოინთან და სხვა კრიპტოვალუტებთან ჯო ბაიდენის ომი დასრულებულიყო. ახლა ეს ომი დასრულდა. მე მივისწრაფი ამერიკა კრიპტო დედაქალაქად გადავაქციო.“- თქვა ტრამპმა.

მან ისიც დასძინა, რომ ციფრული აქტივებისადმი მისმა ერთგულებამ კრიპტო-ინვესტორების პოზიტიურ განწყობას შეუწყო ხელი, რამაც კრიპტოვალუტის ბაზრის ზრდის ტენდენცია განაპირობა. ბიტკოინის კურსმა ყველა დროის უმაღლეს ნიშნულს მიაღწია და 109,000 დოლარს გადააჭარბა.

ახლახანს პრეზიდენტმა საკუთარი ტოკენი  TRUMP გამოუშვა, რამაც მომხმარებელთა უფლებების დაცვის ჯგუფის Public Citizen-ის მხრიდან კრიტიკა გამოიწვია. ჯგუფმა ტრამპი საზოგადოებისთვის შემოწირულობების გამოძალვაში დაადანაშაულა.