ტრამპის განცხადების შემდეგ ბიტკოინმა 83.500 დოლარს გადააჭარბა

ტრამპის განცხადების შემდეგ ბიტკოინმა 83.500 დოლარს გადააჭარბა

აშშ-ის პრეზიდენტმა დონალდ ტრამპმა ჩინეთის გარდა ყველა ქვეყნისთვის 90-დღის განმავლობაში გაზრდილი სავაჭრო ტარიფების გაუქმების შესახებ გამოაცხადა.

ამ ფონზე, პირველი კრიპტოვალუტის კურსმა 83,585 დოლარს გადააჭარბა.

ზრდა არა მხოლოდ ბიტკოინმა, არამედ ძირითადმა ალტკოინებმაც განიცადეს.

დღის განმავლობაში ეთერიუმის ფასი 10%-ით გაიზარდა და 1624 დოლარი შეადგინა, XRP-ის ფასი 2 დოლარამდე გაიზარდა, ხოლო SOL-ის ფასი 115 დოლარამდე. შესამჩნევი ზრდა LINK-მა და AVAX-მაც აჩვენა – ისინი შესაბამისად 12.4 (12.6%) და 18.25 დოლარამდე (10%) გაიზარდა. „მწვანე ზონაში“ აღმოჩნდა Cardano-ს კრიპტოვალუტაც, რომლის ფასიც 0.6224 დოლარამდე გაიზარდა. თავად ბიტკოინი, მკვეთრი ნახტომის მიუხედავად, მოგვიანებით 82,000 დოლარამდე დაკორექტირდა.

კრიპტოვალუტის ბაზარზე გავლენა დონალდ ტრამპმა მოახდინა. მან სხვა ქვეყნებზე ეკონომიკური ზეწოლა დროებით შეამსუბუქა.

მისი თქმით, აშშ-ს ოფიციალურ პირებს სავაჭრო და სავალუტო საკითხების განსახილველად 75-ზე მეტი ქვეყანა დაუკავშირდა. მათზე 90 დღის განმავლობაში 10%-იანი შემცირებული ტარიფი გავრცელდება. თუმცა, ჩინურ იმპორტზე გადასახადი 125%-მდე გაიზარდა და წესები დაუყოვნებლივ ამოქმედდა.

სოციალურ ქსელში ტრამპმა მიღებული მკაცრი ზომები „ჩინეთის მხრიდან გლობალური ბაზრებისადმი უპატივისცემლობით“ ახსნა.

თეთრ სახლში გამართულ კონფერენციაზე აშშ-ს ფინანსთა მინისტრმა სკოტ ბესენტმა (Scott Bessent) სხვა ქვეყნებს მოუწოდა, არ მიეღოთ საპასუხო ზომები და ხაზგასმით აღნიშნა, რომ შეერთებულ შტატებთან მოლაპარაკების მსურველი ნებისმიერი ქვეყნის მოსაზრებას მოუსმენენ.

აშშ-ის ადმინისტრაციის განცხადებებმა გავლენა არა მხოლოდ კრიპტოვალუტებზე, არამედ საფონდო ბირჟაზეც იქონია – ინდექსი S&P 500 9%-ით გაიზარდა.

ტექნოლოგიურ კომპანიებს შორის, Tesla-ს აქციები 14%-ით, Nvidia-ს აქციები 12%-ით, Apple-ის აქციები 11%-ით, Microsoft-ის, Meta-ს და Amazon-ის აქციები 8%-ით, ხოლო Google-ის აქციები 6%-ით გაიზარდა.

ცოტა ხნის წინ ტრამპმა პირობა დადო, რომ აშშ-ს „მსოფლიო ბიტკოინის დედაქალაქად“ აქცევდა და კონგრესს კრიპტოვალუტის შესახებ კანონმდებლობის შემუშავების დაჩქარებისკენ მოუწოდა.

მარტის დასაწყისში მან ხელი მოაწერა ბრძანებულებას ბიტკოინის სახელმწიფო რეზერვის შექმნის შესახებ.