by Bachita Land 
ტრამპის კრიპტო ინიციატივები აშშ-ის ეკონომიკის დესტაბილიზაციას იწვევს
სენატორ ელიზაბეტ უორენის (Elizabeth Warren) განცხადებით, პრეზიდენტ ტრამპის ადმინისტრაციის კრიპტოვალუტასთან დაკავშირებული ინიციატივები სერიოზულ საფრთხეს უქმნის ფინანსურ სისტემას და შესაძლოა აშშ-ის ეკონომიკის დესტაბილიზაცია გამოიწვიოს.
სენატორის თქმით, კრიპტოვალუტების, მათ შორის ტრამპის ოჯახთან დაკავშირებული სტეიბლკოინების გამოყენების გაფართოებაზე მიმართული პოლიტიკა ამერიკულ საზოგადოებას ქაოსისა და ფინანსური მანიპულაციების გზაზე აყენებს.
უორენი დარწმუნებულია, რომ ციფრული აქტივების გამოშვებისა და მიმოქცევის მკაფიო წესების არარსებობამ, რეგულაციების გამარტივებასთან ერთად, შესაძლოა კრიპტოინვესტორებისთვის ფინანსური დანაკარგები გამოიწვიოს და ტრადიციული ფინანსური ბაზრების სტაბილურობა შეარყიოს. მას მიაჩნია, რომ TRUMP-ის მსგავსი ტოკენები გამჭვირვალობისა და ინტერესთა კონფლიქტის შესახებ კითხვებს ბადებს.
„ეს კანონპროექტები სხვა არაფერია, თუ არა აშშ-ის ეკონომიკისთვის ნებისმიერი პოტენციური რისკის იგნორირების პარალელურად, საკუთარი გარემოცვის გამდიდრების მცდელობა.“- განაცხადა უორენმა.
მისი თქმით, მაგალითად, კანონპროექტ CLARITY-ის დებულებებმა, რომლებიც კრიპტოაქტივების რეგულირებისას ფასიანი ქაღალდებისა და ბირჟების კომისიის (SEC) და სასაქონლო ფიუჩერსებით ვაჭრობის კომისიის (CFTC) უფლებამოსილების გაყოფას ითვალისწინებს, შესაძლოა Tesla-ს მსგავს მსხვილ საჯარო კომპანიებს თავიანთი აქციების ტოკენიზირებისა და ბლოკჩეინზე განთავსების შესაძლებლობა მისცეს. ამგვარად კი SEC-ს მათზე ზედამხედველობის უფლებამოსილება ჩამოერთმევა.
ელიზაბეტ უორენის პოზიციას მხარს წარმომადგენელთა პალატის ზოგიერთი რესპუბლიკელი კონგრესმენიც უჭერს. ისინი სამშაბათს, 15 ივნისს დემოკრატ კონგრესმენებს შეუერთდნენ და ტრამპის კრიპტოვალუტების შესახებ კანონპროექტების მიღებას ხელი შეუშალეს.
