ტრამპის მემკოინმა კრიპტო სამყარო ტრანსვესტიტს დაამსგავსა

ტრამპის მემკოინმა კრიპტო სამყარო ტრანსვესტიტს დაამსგავსა

პირადი ფინანსების შესახებ წიგნის „მდიდარი მამა ღარიბი მამა“ ავტორმა რობერტ კიოსაკიმ აშშ-ს ახლად არჩეული პრეზიდენტის დონალდ ტრამპის მიერ გამოშვებული ტოკენის TRUMP-ის მიმართ სკეპტიციზმი გამოხატა.

კიოსაკიმ სოციალურ ქსელ X-ზე დაწერა, რომ პოლიტიკოსების მიერ შექმნილი მსგავსი ტოკენების გამოჩენა იწვევს იმ ძირითადი იდეის გამრუდებას, რომლის მიხედვითაც კრიპტობაზარი ფინანსების მომავალს წარმოადგენს. მწერალი და ინვესტორი ხაზგასმით აღნიშნავს, რომ ვარსკვლავების მიერ შექმნილი ტოკენები მოკლებულია „ფუნდამენტურ საფუძვლებს“.

„რას ვფიქრობ მემკოინ TRUMP-ზე? კარგს არაფერს. სამწუხაროდ, კრიპტო სამყარო ტრანსვესტიტს ემსგავსება, რომელიც ფინანსების მომავლის ნაცვლად ფარსად იქცევა. მე მივყვები ჩემს სტრატეგიას, ვყიდულობ რეალურ აქტივებს: ოქროს, ვერცხლს და ბიტკოინს.“ – წერს კიოსაკი.

ასევე, კიოსაკიმ კიდევ ერთხელ გაილაშქრა კრიპტოვალუტის საბირჟო ფონდების (ETFs) წინააღმდეგ და განაცხადა, რომ ის ინვესტიციას „არანაირ ETF-ში“ არ განახორციელებს, რადგან ასაკიდან გამომდინარე „რეალურ ინვესტიციებს“ ამჯობინებს.

ექვსი თვის წინ მან ტრადიციულ და კრიპტო ETF-ებს „ყალბი ინვესტიციები“ უწოდა და რეალური აქტივებისგან გამიჯნა. კიოსაკის აზრით, აქტივების ყიდვა უმჯობესია პირდაპირ და არა ფონდების მეშვეობით.

დეკემბრის ბოლოს კიოსაკიმ ბიტკოინის ვარდნის გამო პანიკაში ჩავარდნილ ტრეიდერებს „მტირალა ბავშვები“ უწოდა. ის მათ დამშვიდებას იმით შეეცადა, რომ ბაზრის ვარდნით სარგებლობა და მეტი მონეტების შეძენა ურჩია.