ტრამპის ტარიფები ბიტკოინის რალის წაადგება

ტრამპის ტარიფები ბიტკოინის რალის წაადგება

კრიპტო ბირჟა BitMEX-ის დამფუძნებლის განცხადებით, აშშ-ს პრეზიდენტის დონალდ ტრამპის მიერ გაჩაღებულ სატარიფო ომს ფინანსურ ბაზრებზე აღფრთოვანება არ გამოუწვევია, თუმცა მან შესაძლოა ბიტკოინის რალისთვის აუცილებელი კატალიზატორის როლი შეასრულოს.

არტურ ჰეისის (Arthur Hayes) თქმით, 15 აპრილამდე მნიშვნელოვანია, რომ ბიტკოინის კურსი 76,500 დოლარის ნიშნულის ზემოთ შენარჩუნდეს. თუ პირველი კრიპტოვალუტა ამ პოზიციაზე დარჩება, კურსის შემდგომი ვარდნა გამოირიცხება.

„გლობალური დისბალანსი აღმოიფხვრება და მტკივნეული შედეგები დაბეჭდილი ფულით მოგვარდება, რაც ბიტკოინს წაადგება. დოლარი სუსტდება, რადგან უცხოელები ამერიკულ ტექნოლოგიურ კომპანიებს ყიდიან და ფულს სახლში აბრუნებენ. ეს ბიტკოინისა და ოქროსთვის საშუალოვადიან პერსპექტივაში კარგია .“- განმარტა ბიზნესმენმა.

ჩინეთისთვის დაწესებულმა მკაცრმა „ტრამპის ტარიფებმა“ შესაძლოა იუანის შესუსტება გამოიწვიოს. რაც თავის მხრივ, ჩინელ ინვესტორებს აიძულებს, ყურადღება პირველი კრიპტოვალუტის მსგავს უფრო სარისკო აქტივებზე გადაიტანონ.

ჰეისის თქმით, აუცილებელია აშშ-ს ფედერალურმა რეზერვმა (Fed) პოლიტიკა შეამსუბუქოს. მისი განცხადებით, ტარიფების უარყოფითი მაკროეკონომიკური ზემოქმედების კომპენსაციის სახით, ბაზარი განაკვეთების შემცირებას უკვე ელოდება. Fed–ის განაკვეთის შემცირება ლიკვიდობას გაზრდის, რაც ბიზნესმენის დასკვნით, ბიტკოინს და სხვა კრიპტოვალუტებს კერძო ინვესტორებისთვის და საინვესტიციო ფონდებისთვის კიდევ უფრო მიმზიდველს გახდის.

მანამდე, არტურ ჰეისმა კვლევა გამოაქვეყნა, რომლის მიხედვითაც ის ვარაუდობს, რომ შესაძლოა ბიტკოინის კურსმა წლის ბოლომდე 250 000 დოლარს მიაღწიოს.