by Giorgi 
ტრამპმა ციფრული დოლარის ამკრძალავი კანონპროექტის ხელმოწერაზე უარი თქვა
აშშ-ის პრეზიდენტმა დონალდ ტრამპმა განაცხადა, რომ ის ხელს არ მოაწერს საბინაო კანონპროექტს, რომელიც, სხვა საკითხებთან ერთად, მთავრობას ციფრული დოლარის გამოშვებას უკრძალავს. ხელმოწერის ნაცვლად, ტრამპმა კონგრესს საარჩევნო კანონმდებლობის შეცვლა მოსთხოვა.
კანონპროექტის თანახმად, 2030 წლამდე აშშ-ის ფედერალურ რეზერვს (FED) ციფრული დოლარის ან ცენტრალური ბანკის ციფრული ვალუტის (CBDC) მახასიათებლების მქონე სხვა აქტივის გამოშვება ეკრძალება. 2030 წლის შემდეგ FED-ს ციფრული დოლარი გამოშვება მხოლოდ კონგრესის ოფიციალური თანხმობით შეეძლება. აკრძალვა არ ვრცელდება აშშ დოლართან მიბმულ კერძო სტაბილურ კრიპტოვალუტებზე.
ტრამპი SAVE America აქტის დამტკიცების მოთხოვნით კანონმდებლებს ერთგვარ შანტაჟს უწევს. SAVE America Act არამოქალაქეებს აშშ-ში ხმის მიცემას აუკრძალავს. კანონპროექტი არჩევნებში რეგისტრაციისთვის ამომრჩევლისგან ფოტოს შემცველი პირადობისა და მოქალაქეობის დამადასტურებელი დოკუმენტის წარდგენას მოითხოვს.
„სენატის მიერ „ამერიკის გადარჩენის აქტის“ მიღების უუნარობაზე პროტესტის ნიშნად მე კონგრესის მიერ დამტკიცებულ საბინაო კანონპროექტს ხელს არ მოვაწერ. ამ კანონპროექტის მიუღებლობა სიგიჟე და სერიოზული საფრთხე იქნება ნებისმიერი პოლიტიკოსისთვის, რომელიც ხმას მის წინააღმდეგ მისცემს!“ – დაწერა ტრამპმა თავის სოციალურ ქსელში, Truth Social-ზე.
აშშ-ის კონსტიტუციის თანახმად, თუ პრეზიდენტი ხელმოსაწერად მიღებულ კანონპროექტს 10 სამუშაო დღის განმავლობაში ვეტოს არ დაადებს, დოკუმენტი კანონად ავტომატურად იქცევა. საბინაო კანონპროექტი აშშ-ის წარმომადგენელთა პალატამ 358 ხმით 32-ის წინააღმდეგ მიიღო, ხოლო სენატმა 85 ხმით 5-ის წინააღმდეგ. ეს შედეგები პრეზიდენტის ვეტოს დასაძლევად საჭირო ორ მესამედს მნიშვნელოვნად აღემატება.
მაისში აშშ-ის ფინანსთა მინისტრმა სკოტ ბესენტმა (Scott Bessent) პირობა დადო, რომ ციფრულ დოლარს არ გამოუშვებდა. მან კონგრესს კრიპტოვალუტის რეგულირების კანონპროექტ CLARITY-ის სასწრაფოდ მიღებისკენ მოუწოდა. იმავე პერიოდში სამხრეთ კაროლინას გუბერნატორმა ხელი მოაწერა კანონპროექტს, რომელიც ადგილობრივი თვითმმართველობის ორგანოების მიერ ნებისმიერი ცენტრალური ბანკის ციფრული ვალუტის მიღებას კრძალავს.
სიახლეების გამოწერა
