ტრამპმა ხელი სტეიბლკოინების რეგულირების აქტს მოაწერა

ტრამპმა ხელი სტეიბლკოინების რეგულირების აქტს მოაწერა

დონალდ ტრამპმა ხელი მოაწერა აქტს GENIUS, რომელიც შეერთებულ შტატებში დოლართან დაკავშირებული სტაბილური კრიპტოვალუტების გამოშვებისა და მიმოქცევის ძირითად წესებს მოიცავს.

GENIUS აქტი აშშ-ის წარმომადგენელთა პალატამ 306 ხმით მიიღო. ეს გახდა თეთრი სახლის ახალი, პრო-კრიპტოვალუტის ადმინისტრაციის პირველი მნიშვნელოვანი ეროვნული კანონი, რომელიც ციფრული აქტივების ბაზრის ფედერალურ დონეზე რეგულირების წესებს განსაზღვრავს.

„დღეს ჩვენ გიგანტურ ნაბიჯს ვდგამთ წინ, რათა გლობალურ ფინანსებსა და კრიპტოვალუტაში აშშ-ის ლიდერობა განვამტკიცოთ. GENIUS უკვე კანონია.“ – განაცხადა ტრამპმა ხელმოწერის ცერემონიაზე.

კანონი აშშ-ის ბანკებსა და ფინანსურ ინსტიტუტებს კერძო სტეიბლკოინების გამოშვების შესაძლებლობას აძლევს, თუმცა ამ ციფრული აქტივების ემიტენტებს აუდიტისა და ფედერალური ან სახელმწიფო მარეგულირებლების მიერ რეგისტრაციის პარალელურად, 100%-იანი რეზერვის, როგორიცაა აშშ დოლარი ან სახაზინო ობლიგაციები, უზრუნველყოფას ავალდებულებს.

თეთრ სახლში გამართულ ცერემონიაზე მსხვილი კრიპტო კომპანიების ხელმძღვანელები იყვნენ მიწვეული. სტუმართა რიგებში იყვნენ: Coinbase-ის აღმასრულებელი დირექტორი ბრაიან არმსტრონგი (Brian Armstrong), Circle-ის აღმასრულებელი დირექტორი ჯერემი ალერი (Jeremy Allaire), Robinhood-ის აღმასრულებელი დირექტორი ვლად ტენევი (Vlad Tenev), Tether-ის აღმასრულებელი დირექტორი პაოლო არდოინო (Paolo Ardoino), Kraken-ის აღმასრულებელი დირექტორი დეივ რიპლი (Paolo Ardoino), Gemini-ის აღმასრულებელი დირექტორი ტაილერ და კამერონ ვინკლვოსები (Tyler Winklevoss, Cameron Winklevoss) და Ripple-ის იურიდიული დირექტორი სტიუარტ ალდეროტი (Stuart Alderoty).

კრიპტო სამყაროში მიმდინარე პოზიტიური მოვლენების პარალელურად, პლატფორმა CoinGecko-ს ანალიტიკოსების ცნობით, კრიპტოვალუტის ბაზრის კაპიტალიზაციამ ახალ ისტორიულ მაქსიმუმს მიაღწია და ერთ მომენტში 4 ტრილიონ დოლარს გადააჭარბა.