ფლორიდის მთავრობამ ბიტკოინის რეზერვის შექმნის კანონპროექტი წარადგინა

ფლორიდის მთავრობამ ბიტკოინის რეზერვის შექმნის კანონპროექტი წარადგინა

ფლორიდის რესპუბლიკელმა სენატორმა ჯო გრუტერსმა (Joe Gruters) წარადგინა კანონპროექტი SB 550, რომელიც მზარდი ინფლაციის წინააღმდეგ საბრძოლველად სახელმწიფოს ბიუჯეტის ნაწილის ბიტკოინში ინვესტირების შესაძლებლობას მისცემს.

კანონპროექტის მიხედვით, სახელმწიფო ხაზინას სახელმწიფო ბიუჯეტის არაუმეტეს 10%-ის ბიტკოინში დაბანდება და შეძენილი BTC-ის  კვალიფიციურ კასტოდიანთან შენახვა შეეძლება. დამატებითი შემოსავლის მისაღებად, შტატის მთავრობას ასევე გარკვეული პირობებით ბიტკოინის სესხების გაცემა შეეძლება, თუ ეს სესხები სახელმწიფოს ფინანსურ რისკებს არ შეუქმნის.

კანონის მიღების შემთხვევაში, ფლორიდის ხელისუფლება გადასახადებისა და სხვადასხვა მოსაკრებლის ბიტკოინში მიღებას შეძლებს. კრიპტოვალუტა აშშ დოლარში კონვერტირდება და ჩაირიცხება გენერალური შემოსავლების ფონდში (General Revenue Fund, GRF), რომელსაც ადგილობრივი ხელისუფლება მიმდინარე ხარჯებისთვის იყენებს.

გრუტერსის მტკიცებით, შტატის სტრატეგიულ რეზერვში ბიტკოინის დამატებით, ფლორიდა თავისი კაპიტალის ეკონომიკური შოკებისგან და ფასების მკვეთრი ზრდისგან დაცვას შეძლებს.

„ფლორიდის შტატს ბიტკოინის მსგავს ინსტრუმენტებზე წვდომა ინფლაციისგან დასაცავად უნდა ჰქონდეს, რომელმაც მთავრობის ფონდებში არსებული აქტივების მსყიდველუნარიანობას ძირი გამოუთხარა.“- განაცხადა კანონპროექტის ავტორმა.

ფლორიდა არ არის აშშ-ს ერთადერთი შტატი, რომელიც კრიპტოვალუტის რეზერვის შექმნას ცდილობს. რამდენიმე დღის წინ, იუტას წარმომადგენელთა პალატამ მხარი დაუჭირა ბლოკჩეინისა და ციფრული ინოვაციების შესახებ ცვლილებებს, რაც სახელმწიფო ხაზინას კრიპტო აქტივებში ბიუჯეტის 5%-მდე ინვესტირების შესაძლებლობას მისცემს. მსგავს კანონპროექტს ასევე კენტუკის შტატის ოფიციალური პირებიც განიხილავენ.