შვეიცარიულმა ბანკებმა ფრანკთან მიბმული სახელმწიფო სტეიბლკოინის ტესტირება დაიწყეს

by Giorgi
აპრილი 8, 2026

Rate this post

შვეიცარიის უმსხვილესი ბანკების კონსორციუმმა შვეიცარიული ფრანკით (CHF) მხარდაჭერილი სახელმწიფო სტაბილური კრიპტოვალუტის ტესტირება დაიწყო. ტესტირების წარმატების შემთხვევაში, შვეიცარიის მთავრობა 2027 წლიდან ტოკენის შიდა და საერთაშორისო გადახდებისთვის აამოქმედებას გეგმავს.

პროექტში, რომელსაც შვეიცარიის ეროვნული ბანკი კურირებს ბანკები UBS, PostFinance, Sygnum, Raiffeisen, Zürcher Kantonalbank და BCV მონაწილეობენ. სტეიბლკოინის სპეციალურ შეღავათიან რეჟიმში გამოცდა, ე.წ „სენდბოქსი“ 2026 წლის ბოლომდეა დაგეგმილი. პროექტის მონაწილეების თქმით, სენდბოქსი ბანკებს სტეიბლკოინის გამოყენების ცალკეული სცენარების განვითარებისთვის გარემოს შეუქმნის და ციფრულ გადახდებთან მუშაობაში გამოცდილების დაგროვებაში დაეხმარება.

სტეიბლკოინი ქვეყნის ეროვნული რეზერვებით იქნება უზრუნველყოფილი. მისი ინფრასტრუქტურის უზრუნველყოფას კომპანია Swiss Stablecoin განახორციელებს.

გასული წლის სექტემბერში, ექვსი ბანკიდან სამმა – UBS, PostFinance და Sygnum Bank-მა Ethereum-ის ბლოკჩეინზე შვეიცარიულ ფრანკთან მიბმული დეპოზიტური ტოკენის ტესტირება დაასრულა. ბანკებმა შვეიცარიის კანონმდებლობის გათვალისწინებით, ტრადიციული საბანკო არხებით სარგებლობის გარეშე ორგანიზაციებსა და ფიზიკურ პირებს შორის თანხების გადარიცხვის, ასევე ტოკენების რეალურ აქტივებზე გაცვლის შესაძლებლობა გამოსცადეს. პროექტს ზედამხედველობას შვეიცარიის ბანკების ასოციაცია უწევდა.

სტეიბლკოინი CHF შესაძლოა ევროპაში პირველი რეგულირებადი სტაბილური კრიპტოვალუტა გახდეს. თუმცა, შვეიცარულ ფრანკთან მიბმული სულ მცირე ექვსი სტებლკოინი მიმოქცევაში აქამდეც იყო. მათგან ყველაზე წარმატებული 2023 წელს ამოქმედებული Frankencoin-ია (ZCHF). მისი საბაზრო კაპიტალიზაცია 38.5 მილიონ დოლარს აღემატება. მაგრამ, ყველა ტოკენი წარმატებული არ ყოფილა: კომპანია Bitcoin Suisse-ის მიერ გამოშვებულმა CryptoFranc-მა (XCHF) არასაკმარისი მოთხოვნის გამო 2024 წელს ფუნქციონირება შეწყვიტა.

თებერვლის ბოლოს, აქტივების მიხედვით გერმანიის უმსხვილესი ბანკის – Deutsche Bank-ის პლატფორმამ AllUnity შვეიცარიულ ფრანკთან მიბმული ტოკენი – CHFAU გამოუშვა. შვეიცარიული ფრანკი პლანეტის ყველაზე სტაბილურ ეროვნულ ვალუტად ითვლება.

კომენტარები