ჩეხეთის იუსტიციის მინისტრი ბიტკოინის გაყიდვების სკანდალის გამო გადადგა

ჩეხეთის იუსტიციის მინისტრი ბიტკოინის გაყიდვების სკანდალის გამო გადადგა

ჩეხეთის იუსტიციის მინისტრმა პაველ ბლაჟეკმა (Pavel Blazek) დაახლოებით 45 მილიონი დოლარის ღირებულების ბიტკოინების გაყიდვის გამო თანამდებობა დატოვა. ბიტკოინები სამინისტროს დარქნეტში ნარკოტიკების გაყიდვისთვის სასჯელმოხდილმა ტომაშ ირიკოვსკიმ (Tomas Jirikovsky) შესწირა.

რამდენიმე დღის წინ ჩეხეთის იუსტიციის სამინისტრომ აუქციონის წესით 500 ბიტკოინის 1 მილიარდ ჩეხურ კრონად (45 მილიონი აშშ დოლარი) გაყიდვის შესახებ გამოაცხადა.

შემოსული თანხების დახარჯვა მართლმსაჯულების სისტემის გაციფრულების, ციხეებში ნარკოტიკების მოხმარებასთან ბრძოლისა და ციხის თანამშრომლების საცხოვრებელი პირობების გაუმჯობესებაზე იგეგმებოდა.

თუმცა, ადგილობრივმა მედიამ დაადგინა, რომ კრიპტოვალუტა წარსულში ნასამართლევ ტომას ირიკოვსკის ეკუთვნოდა, რომელიც უკანონო საქონლისა და მომსახურების გაყიდვის დარქნეტ პლატფორმა Sheep Marketplace-ის უკან იდგა.

მარტში ირიკოვსკის ადვოკატი ბლაჟეკს დაუკავშირდა და ბიტკოინის მესამედი იუსტიციის სამინისტროსთვის შემოწირულობის სახით შესთავაზა.

ბლეიზეკმა შეთავაზება კრიპტოვალუტის წარმომავლობის გარკვევის გარეშე მიიღო.

ოპოზიციის მხრიდან მზარდი ზეწოლისა და იმ ფაქტის გათვალისწინებით, რომ საკანონმდებლო ორგანოს არჩევნებამდე სულ რაღაც ოთხი თვე დარჩა, პრემიერ-მინისტრმა პეტრ ფიალამ (Petr Fiala) ბლაჟეკისგან დისტანცირება გადაწყვიტა.

30 მაისს ბლაჟეკმა თანამდებობა დატოვა.

„ჩემთვის არ არის ცნობილი რაიმე უკანონო ქმედების შესახებ. არ მქონია შესაძლებლობა ეს საქმე გამომეძიებინა, მით უმეტეს, რომ მისი დახურვიდან მრავალი წელი გავიდა. თუმცა, არ მინდა მთავრობის რეპუტაცია შევლახო.“ – განაცხადა ბლაჟეკმა და დასძინა, რომ ირიკოვსკის მხრიდან ბიტკოინის შემოწირულობა შესაძლოა მის სინანულზე მიუთითებდეს.

2017 წელს ირიკოვსკი დამნაშავედ მითვისებაში, ნარკოტიკებით ვაჭრობასა და იარაღის უკანონოდ გამოყენებაში ცნეს.

2021 წელს გათავისუფლების შემდეგ, მან 1500 ბიტკოინის დაბრუნება მოითხოვა, რომლებიც დაკავების დროს ჩამოერთვა.

ჩეხეთის ხელისუფლება ასევე ეჭვობდა, რომ კრიპტოაქტივები დაკავშირებული იყო კიდევ ერთ დარქნეტ პლატფორმა Nucleus-თან, რომელიც ირიკოვსკის დაკავებისთანავე დაიხურა. თუმცა, მამაკაცი ამტკიცებდა, რომ ბიტკოინები კანონიერად ჰქონდა შეძენილი და  სასჯელის მოხდის შემდეგ მათი შენარჩუნებაც მოახერხა.