ჩრდილოეთ კორეელი ჰაკერების მიერ მოპარული კრიპტოვალუტის მოცულობამ 6 მილიარდ დოლარს გადააჭარბა
by Giorgi 
ჩრდილოეთ კორეელი ჰაკერების მიერ მოპარული კრიპტოვალუტის მოცულობამ 6 მილიარდ დოლარს გადააჭარბა
კიბერუსაფრთხოების პლატფორმა TRM Labs-ის სპეციალისტების ინფორმაციით, ბოლო ცხრა წლის განმავლობაში ჩრდილოეთ კორეელი ჰაკერების მიერ მოპარული კრიპტოვალუტების საერთო ღირებულებამ 6 მილიარდ დოლარს გადააჭარბა.
მიმდინარე წლის პირველ ოთხ თვეში, ჩრდილოეთ კორეული ჰაკერული დაჯგუფებების მიერ მოპარული კრიპტოვალუტის მოცულობა დაახლოებით 577 მილიონი დოლარით გაიზარდა. კომპანიის ანალიტიკოსებმა დააზუსტეს, რომ საუბარია მხოლოდ იმ რამდენიმე ინციდენტზე, რომელთა ჩრდილოეთ კორეულ დაჯგუფებებთან კავშირი ნამდვილად დადასტურდა.
ერთ-ერთ ყველაზე თვალსაჩინო ეპიზოდად 1 აპრილს პროტოკოლ Drift -ზე თავდასხმა დასახელდა, რომლის დროსაც ჰაკერებმა 270 მილიონ დოლარზე მეტი მოიპარეს. უსაფრთხოების ექსპერტების თქმით, ბოროტმოქმედები ოპერაციას სამი კვირის განმავლობაში ამზადებდნენ, მანამდე კი რამდენიმე თვის განმავლობაში სოციალური ინჟინერიის ელემენტებს იყენებდნენ. ამასთან, უშუალოდ ანგარიშების დაცარიელებას მხოლოდ 12 წუთი მოანდომეს.
შემდეგ მასშტაბურ ინციდენტად ექსპერტები 18 აპრილს პლატფორმა Kelp DAO-ზე თავდასხმას ასახელებენ, რომლის დროსაც ზარალმა დაახლოებით 292 მილიონი დოლარი შეადგინა. ჰაკერებმა LayerZero ხიდის არქიტექტურაში არსებული დაუცველობით ისარგებლეს. თავდასხმის შემდეგ, ბოროტმოქმედებმა თანხის ნაწილის „გათეთრება“ THORChain პროტოკოლის მეშვეობით მოახდინეს, თუმცა Arbitrum-ის უსაფრთხოების საბჭომ დაკავშირებულ მისამართებზე დაახლოებით 75 მილიონი დოლარის ღირებულების კრიპტოაქტივების გაყინვა მოასწრო.
TRM Labs-ში მიიჩნევენ, რომ THORChain ჩრდილოეთ კორეელი ჰაკერების მიერ მოპარული სახსრების გათეთრებაში გადამწყვეტ როლს ასრულებს. პროტოკოლმა როგორც ბოლო შეტევებიდან, ისე წარსულში მომხდარი ინციდენტებიდან მიღებული შემოსავლების მნიშვნელოვანი ნაწილი დაამუშავა, რის შედეგადაც ჩრდილოეთ კორეისთვის ასობით მილიონი დოლარის აქტივების ეთერიუმსა და ბიტკოინში კონვერტაცია განხორციელდა.
ცოტა ხნით ადრე, ჩრდილო კორეელი ჰაკერების საკითხს MetaMask-ის უსაფრთხოების ექსპერტი, ტეილორ მონაჰენიც (Taylor Monahan) შეეხო. მისი განცხადებით, ჩრდილოეთ კორეელი სპეციალისტები უკვე მინიმუმ შვიდი წელია კრიპტოკომპანიებსა და დეცენტრალიზებული ფინანსების (DeFi) პროექტებში ჩანერგვას ცდილობენ და ბევრი მათგანის მიზანს სწორედ სისტემების გატეხვა და სახსრების მოპარვა წარმოადგენს.
სიახლეების გამოწერა[simple-author-box]
