by Giorgi 
ჩრდილოეთ კორეელმა ჰაკერებმა საკუთარი ცენტრალური ბანკი გატეხეს და თანხები მოიპარეს
სამხრეთ კორეული გამოცემა Daily NK-ს ცნობით, ჩრდილოეთ კორეის სახელმწიფო სამსახურში დასაქმებულმა ჰაკერებმა ცენტრალური ბანკისა და საგარეო სავაჭრო ბანკის შიდა ქსელები გატეხეს. ჰაკერებმა მოპარული თანხების კრიპტოვალუტაში კონვერტაცია მოახდინეს და საზღვარგარეთ გაიტანეს.
Daily NK-ის ანონიმური წყაროს ცნობით, სამხედრო სამსახურიდან გათავისუფლების შემდეგ, სქემის ორგანიზატორებმა კიმ ჩაეკის პოლიტექნიკური უნივერსიტეტიდან და ფხენიანში არსებული მეცნიერებისა და ტექნოლოგიების უნივერსიტეტიდან ახალგაზრდა IT სპეციალისტების გადმობირება დაიწყეს. წყაროს ცნობით, ჯგუფმა კრიპტოვალუტის ტრანზაქციების მიწისქვეშა ინფრასტრუქტურა შექმნა, რომელსაც ისინი მოპარული თანხების გასათეთრებლად იყენებდნენ.
კომუნიკაციისთვის ჯგუფის წევრები ჩინეთში წარმოებულ სპეციალიზებულ უკაბელო აღჭურვილობას და დაშიფრული შეტყობინებების აპლიკაციებს იყენებდნენ. კიბერნაწილებში სამსახურის დროს შეძენილმა უნარებმა მათ ცენტრალური და საგარეო სავაჭრო ბანკების შიდა ქსელებსა და გადახდის სისტემებში შეღწევის შესაძლებლობა მისცა.
Daily NK-ის წყაროს ცნობით, თანხები ყურადღების მიპყრობის თავიდან ასაცილებლად მცირე ტრანშებად გამოჰქონდათ და უცხოურ კრიპტო საფულეებში გადაჰქონდათ. ამის შემდეგ ჯგუფთან დაკავშირებული ბროკერები ციფრულ აქტივებს ჩინეთში ნაღდ ფულზე ცვლიდნენ. აშშ დოლარი და ჩინური იუანი, სავარაუდოდ, შუამავლების ქსელის მეშვეობით სასაზღვრო ქალაქებში – სინუიჯუსა და ჰიესანში ნაწილდებოდა.
ჩრდილოეთ კორეის ხელისუფლებამ გამოძიება მას შემდეგ დაიწყო, რაც ფინანსური უწყებების თანამშრომლებმა ვალუტის ტრანზაქციების შეჯერებისას შეაუსაბამობები და საბანკო სისტემების უცხოურ IP მისამართებთან საეჭვო კავშირები აღმოაჩინეს.
უსაფრთხოების სამსახურებმა ფხენიანში მდებარე სახლის მისამართი დაადგინეს, საიდანაც, გამომძიებლების თქმით, ოპერაციების კოორდინაცია ხდებოდა. რეიდის დროს დააკავეს ეჭვმიტანილი ორგანიზატორები და IT სპეციალისტები, ამოიღეს კომპიუტერული ტექნიკა და არარეგისტრირებული ტელეფონები.
Daily NK-ის წყაროების ცნობით, ელიტური სახელმწიფო კიბერ დანაყოფების ყოფილი თანამშრომლების კრიმინალურ სქემაში მონაწილეობამ ჩრდილოეთ კორეის მაღალჩინოსნებისა და სამხედრო პერსონალის განსაკუთრებული აღშფოთება გამოიწვია. წყაროს მტკიცებით, მონაწილეებს ყველაზე მკაცრი სასჯელი, მათ შორის სიკვდილით დასჯა ემუქრებათ.
მანამდე კომპანია CertiK-ის კიბერუსაფრთხოების ექსპერტებმა დაადგინეს, რომ ბოლო ათი წლის განმავლობაში ჩრდილოეთ კორეელმა ჰაკერებმა 263 დადასტურებული თავდასხმის შედეგად 6.75 მილიარდი დოლარის ღირებულების კრიპტოვალუტა მოიპარეს.
წყარო: https://www.dailynk.com/english/north-korea-elite-bank-hacking-ring-arrested/
სიახლეების გამოწერა
