ცეტრალური ბანკების ციფრული ვალუტები მომხმარებლებისთვის საფრთხეს არ წარმოადგენს

ცეტრალური ბანკების ციფრული ვალუტები მომხმარებლებისთვის საფრთხეს არ წარმოადგენს

ბლოკჩეინ კონსორციუმ R3-ის აღმასრულებელმა დირექტორმა დევიდ რატერმა უარყო გავრცელებული მოსაზრება, რომ ცენტრალური ბანკის ციფრული ვალუტები მთავრობების მიერ მომხმარებელთა გასაკონტროლებლად იქნება გამოყენებული.

დევიდ რატერმა (David Rutter) კომენტარი რესპუბლიკელი საპრეზიდენტო კანდიდატის – რონ დესანტისის (Ron DeSantis) საპასუხოდ გააკეთა, რომელმაც პირობა დადო, რომ მომავალ არჩევნებში გამარჯვების შემთხვევაში ციფრულ დოლარს აკრძალავს. დესანტისი დარწმუნებულია, რომ ცენტრალური ბანკების ციფრული ვალუტები მოქალაქეების პირად ეკონომიკურ თავისუფლებას და კონფიდენციალურობას საფრთხეს უქმნის.

რატერის აზრით, სახელმწიფო სტეიბლკოინები საფრთხეს არ წარმოადგენს და დესანტისს უბრალოდ შიშის დათესვა უნდა, რომ ამ გზით მეტი ხმები მოიპოვოს. ფული უკვე გახდა ციფრული – სახელმწიფო საკუთრებაში არსებული კრიპტოვალუტები მას მხოლოდ განვითარების ახალ საფეხურზე აიყვანს.

R3-ის ხელმძღვანელი დარწმუნებულია, რომ ნაკლებად სავარაუდოა, ციფრული დოლარი მთავრობისთვის მოქალაქეების მიერ ფულის ხარჯვის ფართომასშტაბიანი კონტროლის ინსტრუმენტად გადაიქცეს, რისიც დესანტისს და მის თანაპარტიელ სკეპტიკოსებს ეშინიათ.

რატერის განმარტებით, კორპორაციები და საგადასახადო ორგანოები სმარტფონების გადახდებისა და ელექტრონული კომერციის საშუალებით უკვე აგროვებენ და ამუშავებენ მონაცემებს მოქალაქეთა ხარჯების შესახებ. აქედან გამომდინარე, CBDC დიდად არ განსხვავდება იმ პრაქტიკისგან, რომელსაც ხელისუფლება  მოქალაქეთა ფინანსების გასაკონტროლებლად უკვე იყენებს. მაგალითად, ბანკებსა და საკრედიტო კავშირებს დიდი ხანია მოეთხოვებათ 10 000 დოლარზე მეტი ტრანზაქციის შესახებ ფედერალურ მთავრობას შეატყობინონ.

„მთავრობები გადახდებს სხვადასხვა გზებით აკონტროლებენ. ფულის გათეთრების საწინააღმდეგო რეგულაციები მოიცავს დებულებებს იმის შესახებ თუ როგორ აკონტროლონ ბანკებმა ტრანზაქციები“ – თქვა რატერმა.

მისი ვარაუდით, ციფრული დოლარის მომხმარებლები კვლავ შეძლებენ ანონიმური ტრანზაქციების განხორციელებას მთავრობის ზედამხედველობის გარეშე, დადგენილი ლიმიტის ფარგლებში.

რატერის პროგნოზით, აშშ-ს ხელისუფლება და სხვა მთავრობები შეძლებენ იპოვონ გზები ხალხის კონფიდენციალურობის დასაცავად.