ციფრული ევრო მზად 2025 წლის ოქტომბრისთვის იქნება

ციფრული ევრო მზად 2025 წლის ოქტომბრისთვის იქნება

ევროპის ცენტრალური ბანკის (ECB) პრეზიდენტის კრისტინ ლაგარდის თქმით, ციფრული ევროს გაშვების წინა მოსამზადებელი ეტაპი 2025 წლის ოქტომბერში დაიწყება, მაგრამ მისი გავრცელება ევროპელ კანონმდებლებზე იქნება დამოკიდებული.

კრისტინ ლაგარდის (Christine Lagarde) განცხადებით, ECB საკუთარ ციფრულ ვალუტაზე (CBDC) ხუთ წელზე მეტი ხნის განმავლობაში მუშაობს და სამუშაოს დასრულებას მითითებულ ვადაში გეგმავს.

თუმცა, გაშვების თარიღი ვერ იქნება ზუსტი, რადგან ECB არ არის პროექტის ერთადერთი მონაწილე. ციფრული ევროს ამოქმედება ასევე სხვა დაინტერესებულ მხარეებზე: ევროპარლამენტზე, ევროკომისიასა და ევროპულ საბჭოზეა დამოკიდებული.მათი მხარდაჭერისა და ამ საკითხთან დაკავშირებით გადაწყვეტილების მიღების გარეშე ციფრული ევრო მხოლოდ ექსპერიმენტად დარჩება.

„ECB მზად არის ფინანსურ სისტემაში ციფრული ევროს დანერგვის ტემპი დააჩქაროს, რათა ამ პროექტმა საბოლოოდ არ „მიიძინოს“, არამედ პირიქით სიცოცხლისუნარიანი გახდეს. ჩვენი ბოლო ვადა 2025 წლის ოქტომბერია და ამისთვის ვემზადებით.“- განაცხადა ლაგარდმა.

მან აღნიშნა, რომ ციფრული ევრო ევროპისთვის აქტუალური როგორც საბითუმო, ისე საცალო დონეზე იქნება. საბითუმო CBDC განკუთვნილია ფინანსური ინსტიტუტებისთვის, რომლებიც ბანკთაშორის ანგარიშსწორებას და საერთაშორისო გადახდებს ახორციელებენ. საცალო CBDC კი ხელმისაწვდომი ფიზიკური პირებისთვის იქნება.

ლაგარდმა დასძინა, რომ ევროპა ციფრული ევროს შემოღების გეგმის განხორციელებას შეერთებული შტატების მხრიდან CBDC-ის მიმართ შეცვლილი პოზიციის მიუხედავად გააგრძელებს. ცოტა ხნის წინ, აშშ-ის პრეზიდენტმა დონალდ ტრამპმა ხელი მოაწერა აღმასრულებელ ბრძანებას, რომელიც აშშ-ს ფედერალურ სარეზერვო სისტემას (FRS) ციფრული დოლარის გაშვებას უკრძალავს.

მანამდე ECB-ის აღმასრულებელი საბჭოს წევრმა პიერო ციპოლონემ (Piero Cipollone) განაცხადა, რომ ციფრული ევრო ევროპას Mastercard და Alipay-ის მსგავსი ამერიკული და ჩინური საგადახდო კომპანიებისგან დამოუკიდებლობის მოპოვებაში დაეხმარება.