ციფრული ლარის საპილოტე პროექტის ტექნოლოგიური პარტნიორი Ripple ხდება
საქართველოს ეროვნული ბანკის განცხადებით, მსოფლიოში ერთ-ერთი წამყვანი ტექნოლოგიური კომპანია Ripple, ციფრული ლარის საპილოტე პროექტის ტექნოლოგიური პარტნიორი გახდა.
ტრანსსასაზღვრო გადახდების ერთ-ერთი წამყვანი ქსელი Ripple, ფინანსურ ინსტიტუტებს ბლოკჩეინის ტექნოლოგიებისა და ციფრული აქტივების ინტეგრირებაში ეხმარება. კომპანია ცენტრალური ბანკებისთვის, ფინანსური ინსტიტუტებისა და მთავრობებისთვის უნივერსალური გადაწყვეტების შეთავაზების უნარით გამოირჩევა, მისი შერჩევაც ამ ნიშნით მოხდა. ამჟამად კომპანია სხვადასხვა ქვეყნის მთავრობებთან და ცენტრალურ ბანკებთან ერთად ხუთ საპილოტე პროგრამაზე მუშაობს.
„მოხარული ვართ, რომ ყველა მონაწილე კომპანიის საფუძვლიანი განხილვის შემდეგ, Ripple ჩვენი ციფრული ლარის საპილოტე პროექტის ოფიციალურ ტექნოლოგიურ პარტნიორად შევარჩიეთ. კომიტეტმა Ripple-ზე არჩევანი მისი შესანიშნავი ტექნიკური მონაცემებისა და გუნდის გამოცდილების გამო შეაჩერა. მოუთმენლად ველით Ripple-თან ერთად მუშაობის გაგრძელებას, ყველა სხვა მონაწილე კომპანიას კი მადლობას ვუხდით შერჩევის პროცესში გამოვლენილი ინტერესისა და ძალისხმევისთვის,“- განაცხადა ეროვნული ბანკის პრეზიდენტის მოვალეობის შემსრულებელმა ნათია თურნავამ.
თავის მხრივ, , Ripple-ის ვიცე-პრეზიდენტმა ჯეიმს უოლისმა (James Wallis) აღნიშნა, რომ ეროვნული ბანკი ქვეყნის ეკონომიკის ციფრულ ეპოქაში გადასაყვანად ბლოკჩეინ ტექნოლოგიების გამოყენების შესწავლის თვალსაზრისით „გლობალურ ლიდერობას იკავებს“.
„საქართველოს ეროვნულ ბანკთან თანამშრომლობა ჩვენი მხრიდან ინოვაციების დანერგვის ხელშეწყობას წარმოაჩენს, რაც საჯარო უწყებებში ბლოკჩეინ ტრანზაქციების გამჭვირვალობასა და სანდოობას გააძლიერებს.“- აღნიშნა ჯეიმს უოლისმა.
ციფრული ლარის პროექტის განხორციელების შემდეგ ნაბიჯს საქართველოს ეროვნული ბანკი და Ripple ერთობლივად შეიმუშავებენ.
- გამოგვეყვით ტელეგრამზე t.me/cryptonewsgeorgia
- დაემატეთ ჩვენს ჯგუფში Fb.me/groups/cryptonewsgeorgia
Comments (No)