by Giorgi 
ცხრა ანონიმურმა საფულემ Polymarket-ზე კონტროლი მოიპოვა
სააგენტო Bloomberg-ის ცნობით, ცხრა ანონიმური კრიპტოსაფულისგან შემდგარმა ჯგუფმა ბლოკჩეინ-პლატფორმა Polymarket-ის უმსხვილეს საპროგნოზო ბაზრებზე შედეგების განსაზღვრაში საკვანძო როლი მოიპოვა. ამ საფულეებში UMA ტოკენების თითქმის ნახევარია კონცენტრირებული. ტოკენები სხვა ფუნქციებთან ერთად, პლატფორმაზე დავების გადაჭრას ემსახურება.
ტოკენების მფლობელთა ამ ჯგუფმა არაერთხელ მიიღო სადავო გადაწყვეტილება კონტრაქტებზე, რომლებიც მილიარდობით დოლარის ფსონებს უკავშირდებოდა. სააგენტოს გამოთვლით, წლის განმავლობაში Polymarket-ზე 2000-მდე სადავო კონტრაქტი გაჩნდა – ისინი არჩევნების შედეგებს, სამხედრო კონფლიქტების მსვლელობას და სხვა პოლიტიკურ მოვლენებს ეხებოდა. მხოლოდ აპრილის განმავლობაში UMA-ზე დაფუძნებული კენჭისყრის მეშვეობით მილიარდი დოლარის დავები დარეგულირდა.
Bloomberg-ის ანალიზმა აჩვენა, რომ პლატფორმაზე სადავო საკითხების გადაწყვეტის უფლების მქონე UMA-ს მფლობელი სულ 6400 მისამართია. თუმცა, სააგენტოს მიერ მითითებული ცხრა საფულის მიერ ხმის მიცემა ხშირად შეთანხმებულად ხდება და საბოლოო ჯამში, შედეგი მათ სასარგებლოდ გადაწონის ხოლმე.
Polymarket-ის წესების მიხედვით, სადავო სიტუაციების გადასაჭრელად (მაგალითად, როდესაც მოვლენის შედეგი აშკარა არ არის), პროგნოზს კენჭს UMA ტოკენის მფლობელები უყრიან. მაგალითად, ხმის მიცემა გაიმართა საკითხზე – მიიტანეს თუ არა აშშ-მა და ისრაელმა იერიში ირანის ობიექტებზე – იმ დროს, როდესაც ფაქტის დადასტურება ჯერ კიდევ არ არსებობდა.
Bloomberg-ის მიერ გამოკითხული ექსპერტები აღნიშნავენ, რომ ხმების ასეთი კონცენტრაციის გამო, ზოგიერთი ტრეიდერი ახლა ფუნდამენტურ ფაქტორებსა და რეალურ წინაპირობებზე დაყრდნობის ნაცვლად, UMA-ს მსხვილი მფლობელების ქცევას აკვირდება, რაც ხშირად, განსაკუთრებით პოლიტიკური პროგნოზების ბაზრებზე, კერძო ინვესტორების მიერ ფულის დაკარგვას იწვევს.
აშშ-ის პრეზიდენტის დონალდ ტრამპის განცხადებით, ბლოკჩეინ-პროგნოზების ბაზარი სასაქონლო ფიუჩერსების სავაჭრო კომისიამ (CFTC) უნდა გააკონტროლოს. მანამდე ამ უწყებაზე ეჭვი ტრამპის ოჯახთან ირიბად დაკავშირებული კრიპტოკომპანიების ინტერესების ლობირებაში მიიტანეს. იმ სახელმწიფო მოხელეებს, რომლებიც Polymarket-სა და მსგავს პლატფორმებს აკრიტიკებდნენ, შტატების ლიდერმა „ნაგავი“ უწოდა.
სიახლეების გამოწერა
