Kraken-ის განცხადებით ხელისუფლების ბრალდებები შეთხზულია

Kraken-ის განცხადებით ხელისუფლების ბრალდებები შეთხზულია

კრიპტოვალუტის ბირჟა Kraken რომელსაც აშშ-ის ფასიანი ქაღალდებისა და ბირჟების კომისიამ (SEC) ბრალი წაუყენა, მარეგულირებელთან ბრძოლას და სასამართლოში ყველა საჩივარზე რეაგირებას აპირებს.

CNBC-სთან გაკეთებულ განცხადებაში კომპანიის მთავარი იურიდიული კონსულტანტი, მარკო სანტორი (Marco Santori) აღნიშნავს, რომ SEC-თან სამართლებრივ ბრძოლას შესაძლოა რამდენიმე თვე დასჭირდეს.

„ფასიანი ქაღალდებისა და ბირჟების კომისიის განცხადებით, კრაკენი საკლირინგო პალატასა და ბროკერ-დილერს წარმოადგენს. არაფერი მსგავსი სინამდვილეში არ არსებობს. ბრალდება SEC-ის მიერ არის შეთხზული და ჩვენ მას არ ვეთანხმებით.“ – განაცხადა ადვოკატმა.

კრიპტო ბირჟის წარმომადგენლის განცხადებით, სხვა ქვეყნები შეერთებული შტატებისგან განსხვავებით, ქმნიან ისეთ მარეგულირებელ ჩარჩოს, რომელიც ციფრული აქტივების სფეროში მომუშავე კომპანიებს ეხმარება.

ადვოკატის მტკიცებით, Kraken არ გაურბის რეგულაციებს, არამედ ხელისუფლებისგან ისეთი სამართლებრივი ჩარჩოს უზრუნველყოფას ითხოვს, რომლის არსებობასაც „კრიპტო ეკოსისტემისთვის აზრი ექნება.“

სანტორის აზრით, ივლისში Ripple-ის SEC-თან გამარჯვებამ ნამდვილი პრეცედენტი შექმნა. მოსამართლემ დაადგინა, რომ ეკოსისტემის ტოკენი XRP ფასიან ქაღალდად ვერ ჩაითვლებოდა. ეს პრეცედენტი ახლა იმ კომპანიებს წაადგებათ, რომლებიც მარეგულირებელთან საქმის წარმოებაში არიან ჩართული, ამბობს Kraken-ის იურისტი.

შეგახსენებთ, რომ ცოტა ხნის წინ SEC-მა Kraken-ის წინააღმდგ სან-ფრანცისკოს ფედერალურ საოლქო სასამართლოში სარჩელი შეიტანა. SEC-ის მტკიცებით, 2018 წლის სექტემბრიდან მოყოლებული კრიპტო ბირჟა ხელს უწყობს კრიპტოაქტივების უკანონო ყიდვა-გაყიდვას და ამის ხარჯზე ასობით მილიონი დოლარი გამოიმუშავა.

გარდა ამისა, კანონით გათვალისწინებული რეგისტრაციის გარეშე ფუნქციონირებს როგორც ბირჟა, ბროკერი, დილერი და საკლირინგო სააგენტო.

ბირჟის თანადამფუძნებელმა ჯესი პაუელმა (Jesse Powell) მარეგულირებელს „ამერიკის მუხრუჭი“ უწოდა და ყველა კრიპტოკომპანიას ამერიკის იურისდიქციის დატოვებისკენ მოუწოდა.