ხელოვნური ინტელექტი კრიპტოდანაშაულთა უმეტესობის გახსნას შეძლებს

ხელოვნური ინტელექტი კრიპტოდანაშაულთა უმეტესობის გახსნას შეძლებს

Chainalysis-ის აღმასრულებელი დირექტორის თქმით, მომდევნო ხუთი წლის განმავლობაში პროკურატურა და საგადასახადო სამსახური დანაშაულთა გამოსაძიებლად ხელოვნური ინტელექტის ინსტრუმენტებს აქტიურად გამოიყენებენ.

მაიკლ გრონეგერი სინგაპურში გამართულ კონფერენცია Token 2049-ზე სიტყვით გამოვიდა. მან დამსწრეებს მომავალში კრიმინალური და ფინანსური დანაშაულებების გამოძიებაში ხელოვნური ინტელექტის ინსტრუმენტების შესაძლო გამოყენების შესახებ საკუთარი პროგნოზები გაუზიარა. Chainalysis-ის აღმასრულებელი დირექტორის თქმით, გამოძიების ავტომატიზაცია სამართალდამცავ და ფისკალურ ორგანოებს ბლოკჩეინის ეფექტური სკანირებისა და ეჭვმიტანითა შორის კავშირის დადგენის შესაძლებლობას მისცემს.

„შესაძლოა, რამდენიმე წელიწადში დანაშაულის გახსნის ერთ-ერთი ყველაზე ეფექტური გზა ბლოკჩეინის მონაცემებისა და ციფრული აქტივების გადაადგილების ანალიზი გახდეს. ეს მასშტაბირებადი და გამჭვირვალე გარემოა, რომლის გამოყენება საერთაშორისო დონეზეა შესაძლებელი და სამართალდამცავი უწყებებისთვის სასარგებლო მონაცემების მოპოვების შესაძლებლობას იძლევა.“

კრიპტოვალუტასთან დაკავშირებულ დანაშაულებათა რაოდენობის მკვეთრი ზრდის მიუხედავად, კონფიდენციალურ ციფრულ აქტივებთან დაკავშირებული ტრანზაქციების წილი ოპერაციათა მთლიანი მოცულობის 1%-ზე ნაკლებს შეადგენს.

ამიტომ, დანაშაულებათა გამოძიებისთვის გენერაციული ხელოვნური ინტელექტის დანერგვა შესაძლოა სწრაფი და ეფექტური ინსტრუმენტი გახდეს, რომელიც სამართალდამცავ ორგანოებს ფუნქციების არასაჭირო დუბლირების თავიდან აცილების შესაძლებლობას მისცემს, მიიჩნევს სპეციალისტი.

გრონეგერი დასძენს, რომ მისი მონაცემებით, აშშ-ს საგადასახადო ორგანოები AI-ს უკვე იყენებენ. ხელოვნური ინტელექტი სამართალდამცავ ორგანოებს საშემოსავლო გადასახადებისგან თავის არიდებისა და ციფრული აქტივების ბრუნვის შესახებ მონაცემთა დამალვის ფაქტების გამოვლენაში ეხმარება.

მანამდე აშშ-ს სახაზინო დეპარტამენტმა და შიდა შემოსავლების სამსახურმა ანგარიშგების ახალი პროცედურა დაამტკიცეს, რომელიც კრიპტოვალუტის ბროკერებს, მათ შორის ბირჟებსა და გადახდის სისტემებს, საშემოსავლო სამსახურისთვის ციფრული აქტივების გაყიდვისა და გაცვლის ყველა შემთხვევის შესახებ ინფორმაციის მიწოდებას ავალდებულებს.