ჰაკერებმა კრიპტობირჟების მომხმარებელთა მონაცემებზე წვდომა მოიპოვეს

ჰაკერებმა კრიპტობირჟების მომხმარებელთა მონაცემებზე წვდომა მოიპოვეს

კომპანია Hudson Rock-ის კიბერუსაფრთხოების ექსპერტებმა დარქნეტში 5000 დოლარად Kodex Global-ის პორტალზე წვდომის მოპოვების შესახებ განცხადება აღმოაჩინეს.

Kodex Global არის პლატფორმა, სადაც სხვადასხვა ქვეყნების სამართალდამცავ ორგანოებსა და Binance-ისა და Coinbase-ის მსგავს კრიპტო პლატფორმებს შორის, კონფიდენციალური ინფორმაციის გაცვლა ხდება.

განცხადება Tamagami-ის ნიკით დარეგისტრირებულმა უცნობმა მომხმარებელმა გაავრცელა.

Hudson Rock-ის ექსპერტების განმარტებით, Kodex Global-ზე არასანქცირებული წვდომა ვინაობის გამხელის გარეშე, ციფრული და სოციალური პლატფორმების მომხმარებლების პერსონალურ მონაცემებზე წვდომის შესაძლებლობას იძლევა, რითაც საფრთხე ექმნება კლიენტების კონფიდენციალურობას და რისკის ქვეშ დგება მათი ფინანსური უსაფრთხოება.

Kodex Global-ის სისტემაზე წვდომა ჰაკერმა სავარაუდოდ, ჯერ კიდევ დაუდგენელი სამართალდამცავების პირადი კომპიუტერების მავნე პროგრამა Infostealer-ით დაინფიცირების მეშვეობით მოახდინა.

„საქმე ეხებათ რეალურ სამართალდამცავებს, რომლებმაც კიბერუსაფრთხოების ზომები უგულებელყვეს და საკუთარი ანგარიშებიდან მონაცემების გაჟონვა დაუშვეს. აუცილებელია, რომ აღნიშნული შემთხვევა ყველა დაინტერესებულმა ორგანიზაციამ გაითვალისწინოს და უსაფრთხოების შესაბამისი პროტოკოლები შექმნას, რათა მსგავს სისტემებზე წვდომა მხოლოდ და მხოლოდ ლეგიტიმურ მფლობელებს ჰქონდეთ.“- აღნიშნავენ Hudson Rock-კის ექსპერტები.

პოლიციის რეალური თანამშრომლების პირადი „ექაუნთების“ სახით, ცნობილია Kodex Global-ზე არასანქცირებული წვდომის მინიმუმ 50 წერტილი. მათ შორის არის ბრაზილიის სამოქალაქო პოლიციის, არკანზასის პოლიციის (აშშ), იტალიური სააგენტო GDF-ის, პორტუგალიური სასამართლო ექსპერტიზის ცენტრისა და სხვათა თანამშრომლების ანგარიშები.