by Giorgi 
108 მილიონიანი ზარალის შემდეგ Gemini-ს აქციები დაეცა
ხუთშაბათს, 13 აგვისტოს კრიპტობირჟა Gemini-ს აქციები 7%-ზე მეტით დაეცა. ამის მიზეზი მეორე კვარტლის ფინანსური ანგარიში გახდა, რომლის მიხედვითაც კომპანიამ სერთო შემოსავლის 37%-იანი ზრდის მიუხედავად, 107.7 მილიონი დოლარის წმინდა ზარალი განიცადა.
გასული წლის ანალოგიური პერიოდის 33.3 მილიონთან შედარებით, კომპანიამ წელს 45.5 მილიონი დოლარის შემოსავალი მიიღო. ამასთან, წმინდა ზარალი გასული წლის 133.2 მილიონ დოლართან შედარებით 19%-ით შემცირდა.
„მიუხედავად იმისა, რომ წინ ბევრი სამუშაო გველოდება, ამ კვარტლის შედეგები ასახავს ჩვენს მუდმივ მცდელობას საოპერაციო ხარჯები შევამციროთ და შემოსავლის წყაროების დივერსიფიკაცია მოვახდინოთ.“ – განაცხადა Gemini-ს გენერალურმა დირექტორმა, ტაილერ ვინკლვოსმა.
Gemini-ს საკრედიტო ბარათებიდან მიღებული შემოსავალი 231%-ით გაიზარდა და 16.2 მილიონი დოლარი შეადგინა, ხოლო სტეიკინგის შემოსავალმა 50%-ით იმატა და 4 მილიონ დოლარს მიაღწია.
უშუალოდ ბირჟის სატრანზაქციო შემოსავალი 38%-ით (12.5 მილიონ დოლარამდე) შემცირდა. ამის მიზეზი სავაჭრო მოცულობის მკვეთრი ვარდნაა – გასული წლის 11.3 მილიარდი დოლარიდან მიმდინარე 3.8 მილიარდ დოლარამდე.
Gemini-ს პროგნოზირების ბაზარმა (Prediction market) კვარტლის განმავლობაში 500,000 დოლარის შემოსავალი მოიტანა, რაც ოდნავ აღემატება დეკემბერში, გაშვების შემდეგ გამოქვეყნებულ 400,000 დოლარს. შემოსავლის მცირე ზრდის მიუხედავად, პლატფორმაზე დადებული ღონისძიებების კონტრაქტების რაოდენობა პირველ კვარტალთან შედარებით 93%-ით გაიზარდა.
მას შემდეგ, რაც Gemini-მ აპრილში მარეგულირებლისგან (CFTC) ნებართვა მიიღო, ამ თვის დასაწყისში საკუთარი ფინანსური ანგარიშსწორების სისტემა ჩაუშვა. ეს კომპანიას საშუალებას აძლევს, საპროგნოზო ბაზრის ტრანზაქციები შუამავლების გარეშე, თავადვე დაამუშაოს და დაასრულოს. პარალელურად, Gemini გეგმავს, პლატფორმას კრიპტო-ფიუჩერსები და სხვა რთული ფინანსური ინსტრუმენტებიც დაამატოს.
იმ ფონზე, როდესაც ძირითად კრიპტობირჟაზე სავაჭრო აქტივობა კვარტლიდან კვარტლამდე მცირდება, კომპანია ცდილობს პლატფორმის საქმიანობას უფრო ფართო ფინანსური მასშტაბები შესძინოს. ამ სტრატეგიის ფარგლებში, ივლისში Gemini-მ აქციებით საკომისიოს გარეშე ვაჭრობის ფუნქციაც აამოქმედა.
„Gemini-ს პლატფორმა ბოლო ცხრა თვის განმავლობაში უფრო მეტად შეიცვალა, ვიდრე მთელი გასული ათწლეულის მანძილზე.“ – აღნიშნა Gemini-ს პრეზიდენტმა, კამერონ ვინკლვოსმა.
Gemini-ს ყოველთვიური აქტიური მომხმარებლების რაოდენობა წელს 11%-ით გაიზარდა, თუმცა პლატფორმაზე არსებული აქტივების ჯამური ღირებულება 18.2 მილიარდიდან 8.4 მილიარდ დოლარამდე შემცირდა, რაც წამყვანი კრიპტოვალუტების გაუფასურებას უკავშირდება.
ამჟამად Gemini Space Station-ის აქციები (GEMI) კვლავ ისტორიულ მინიმუმთან ახლოს, 4 დოლარზე დაბალ ნიშნულზეა.
სიახლეების გამოწერა
