ბიტკოინი სულ უფრო ცენტრალიზებული ხდება

ბიტკოინი სულ უფრო ცენტრალიზებული ხდება

კრიპტო საფულე Komodo-ს ტექნიკური დირექტორის, კადან სტადელმანის მოსაზრებით, ბიტკოინის ქსელის ცენტრალიზაციის მზარდი ტენდენცია BTC-ის, როგორც დეცენტრალიზებული კრიპტოვალუტის ფუნდამენტურ პრინციპს უქმნის საფრთხეს.

კადან სტედელმანმა (Kadan Stadelmann) ყურადღება ზოგიერთ მაინინგ პულში ჰეშრეითის მზარდ კონცენტრაციაზე გაამახვილა. ამასთან აღსანიშნავია, რომ მხოლოდ ორი მათგანი – Foundry USA და Antpool – ერთად ბიტკოინის ჰეშის დაახლოებით 50%-ს აკონტროლებს.  Blockchain.com-ის მონაცემებით, Foundry USA-ზე, რომელმაც 152 ბლოკი მოიპოვა, ჰეშრეითის 26.1% მოდის, ხოლო Antpool-ზე 139 ბლოკით 23,8%.

ამასთან, ბიტკოინის ჰეშრეითი ხუთ პულს შორისაა კონცენტრირებული, რომლებიც ერთობლივად ბიტკოინის ჰეშის 80%-ს აკონტროლებენ, – აღნიშნა სტადელმანმა. ასეთი ცენტრალიზაცია საფრთხეს უქმნის ქსელს, რადგან პულებს გადაწყვეტილების მიღების პროცესებსა და ტრანზაქციებზე გავლენის მოხდენა შეუძლიათ.

„ მნიშვნელოვან რესურსებს მაინერების უმცირესობა აკონტროლებს, რაც ბიტკოინის დეცენტრალიზებულ ბუნებას ძირს უთხრის. ეს სცენარი კითხვის ნიშნის ქვეშ აყენებს თანასწორობას, რომელიც ბიტკოინმა უნდა უზრუნველყოს.“ – განაცხადა კომოდოს ტექნიკურმა დირექტორმა.

ის ასევე შიშობს, რომ ბიტკოინის მაინინგში წამყვანი ფინანსური ინსტიტუტები სულ უფრო მეტად ერთვებიან.

მაგალითად, ცნობილი კომპანიები BlackRock, Morgan Stanley, Goldman Sachs და Vanguard, ორი უდიდესი მაინინგ კომპანიის Riot Blockchain-ისა და  Marathon Digital Holding-ის უმსხვილეს ქციონერებს წარმოადგენენ, რაც ცენტრალიზაციის რისკს ასევე ზრდის, რადგან ბიტკოინის ქსელის კონტროლი შესაძლოა რამდენიმე ადამიანზე იყოს დამოკიდებული.