by Giorgi 
2035 წლისთვის ბიტკოინი ოქროს გადაასწრებს
კომპანია Strategy-ის დამფუძნებელმა და აღმასრულებელმა თავმჯდომარემ მაიკლ სეილორმა (Michael Saylor) განმარტა, თუ რატომ შეიძლება 2035 წლისთვის ბიტკოინმა საბაზრო კაპიტალიზაციით ოქროს გადაასწროს და წამყვან ძვირფას ლითონზე უფრო ღირებული გახდეს.
Yahoo Finance-თან ინტერვიუში ბიზნესმენმა განაცხადა, რომ ბიტკოინი ოქროს საბაზრო კაპიტალიზაციას 21 მილიონი მონეტის ფიქსირებული მარაგის მეშვეობით გადააჭარბებს.
ბიტკოინის მოპოვების მიმდინარე გრაფიკის თანახმად, 2035 წლისთვის მაინერები მონეტების ლიმიტის 99%-ს მოიპოვებენ. ეს ნიშნავს, რომ ათ წელიწადში დადგება ის წელი, რომელსაც ბიზნესმენი „0.99 წელს“ უწოდებს. მისი დადგომის შემდეგ ახალი ბიტკოინები ბაზარზე უფრო და უფრო იშვიათად და ძალიან მცირე რაოდენობით გამოჩნდება.
გრაფიკის თანახმად, ბიტკოინების ბოლო 1% მხოლოდ მომდევნო ასი წლის განმავლობაში უნდა მოიპოვონ.
მსოფლიოში პირველი კრიპტოვალუტის უმსხვილესი საჯარო მფლობელის აღმასრულებელი დირექტორი დარწმუნებულია, რომ უკიდურესი სიმწირე ბიტკოინის გრძელვადიან პერსპექტივებს აძლიერებს და ზრდის მის ფასს.
სეილორის მტკიცებით, ბიტკოინით ინვესტირების მსურველი ფინანსური კომპანიების მზარდი ინტერესი იმაზე მიუთითებს, რომ მსხვილმა ინვესტორებმა ბიტკოინის ციფრულ ოქროდ აღქმა დაიწყეს.
ამჟამად ბიტკოინის საბაზრო კაპიტალიზაცია დაახლოებით 1.9 ტრილიონი დოლარია, ხოლო ოქროს საბაზრო კაპიტალიზაცია 29 ტრილიონ დოლარს აჭარბებს.
იმისათვის, რომ ბიტკოინმა საბაზრო კაპიტალიზაციით ოქროს გადაუსწროს, მისი ფასი მინიმუმ 1.4 მილიონ დოლარამდე უნდა გაიზარდოს.
„თუ გსურთ ბიტკოინს ფლობდეთ, ის რაც შეიძლება მალე უნდა შეიძინოთ, რადგან ბიტკოინის დარჩენილი ბოლო 1%-ის მოპოვება კიდევ ასი წლის მანძილზე გაგრძელდება. ეჭვი არ მეპარება იმაში, რომ ბიტკოინი ოქროზე უფრო დიდი და ღირებული აქტივი გახდება.“ თქვა სეილორმა.
Strategy-ის ხელმძღვანელის თქმით, პირველი კრიპტოვალუტის ფასმა წლის ბოლომდე 150,000 აშშ დოლარს უნდა მიაღწიოს. თუმცა, ამჟამად ბიტკოინი დაღმავალ ტენდენციაშია და 96,000 აშშ დოლარს ქვემოთ დაეცა.
