by Giorgi 
ევროკავშირი რუსეთთან მომუშავე 11 კრიპტოპლატფორმას დაასანქცირებს
ევროკავშირის საგარეო საქმეთა და უშიშროების პოლიტიკის საკითხებში უმაღლესი წარმომადგენლის კაია კალასის (Kaja Kallas) განცხადებით, სანქციების 21-ე პაკეტში ევროკავშირი 11 კრიპტოპლატფორმისთვის შეზღუდვების დაწესებას გეგმავს. ევროპელი ოფიციალური პირების თქმით, ეს სერვისები რუსეთის ხელისუფლებასა და ბიზნეს სექტორს საერთაშორისო სანქციების გვერდის ავლაში ეხმარება.
კალასის თქმით, ახალი შეზღუდვები არა მხოლოდ კრიპტოსერვისებზე, არამედ სხვა არხებზეც იმოქმედებს, რომლებსაც რუსეთის სამთავრობო უწყებები და კომპანიები არსებული სანქციების გვერდის ავლისთვის იყენებენ.
„ჩვენ კრიპტო აქტივებთან დაკავშირებული სერვისების რიგი მესამე ქვეყნებისთვის მიწოდებაზე აკრძალვას გავამკაცრებთ, გავაფართოვებთ სანქცირებულთა სიებს და ავკრძალავთ ტრანზაქციებს 11 კრიპტოპლატფორმასთან.“– განაცხადა ევროკავშირის უმაღლესმა დიპლომატმა, თუმცა კონკრეტული პლატფორმები არ დაუსახელებია.
ევროკომისიის პრეზიდენტის, ურსულა ფონ დერ ლაიენის (Ursula von der Leyen) თქმით, ახალი სანქციები მიზნად ისახავს იმ სუბიექტებზე ზეწოლის გაზრდას, რომლებიც რუსეთს საერთაშორისო ფინანსურ ტრანზაქციებზე წვდომის შენარჩუნებაში ეხმარებიან.
ოფიციალური პირების თქმით, კრიპტოსერვისების გარდა, ახალი პაკეტი ტრადიციულ ფინანსებზეც გავრცელდება. დაახლოებით 90 რუსულ ბანკს შესაძლოა დამატებითი შეზღუდვები დაეკისროს, მათგან 31-ს კი ოპერაციების სრული აკრძალვა ემუქრება.
მანამდე, სანქციების მე-20 პაკეტის ფარგლებში ევროკავშირმა შეზღუდვები დაუწესა რუსეთში რეგისტრირებულ პროვაიდერებსა და იმ პლატფორმებს, რომლებიც კრიპტოვალუტების გადარიცხვისა და გაცვლის შეაძლებლობას იძლეოდნენ. აკრძალვა ძალაში 24 მაისს შევიდა.
წყარო: https://x.com/kajakallas/status/2064302685365407990
სიახლეების გამოწერა
