კრიპტოვალუტის ბაზარზე მიკროინვესტორები ბრუნდებიან

კრიპტოვალუტის ბაზარზე მიკროინვესტორები ბრუნდებიან

კრიპტოვალუტების ბაზრის ზრდა კვლავ იზიდავს საცალო ინვესტორებს მცირე დეპოზიტებით, რომლებიც ციფრული აქტივების შესაძენად ან გასაყიდად Robinhood-ის მსგავსი აპლიკაციების გამოყენებას იწყებენ.

გამოცემა Bloomberg-ის ცნობით, კრიპტოვალუტის ამერიკულ ბირჟაზე Coinbase 2023 წლის მეოთხე კვარტალში საცალო ინვესტორების ტრანზაქციებიდან მიღებული წმინდა მოგება წინა წლის ანალოგიურ პერიოდთან შედარებით 60%-ით, ხოლო მესამე კვარტალთან შედარებით 80%-ით გაიზარდა.

პლატფორმა Robinhood-ის განცხადებით, დეკემბერში კრიპტოვალუტით ვაჭრობის მოცულობა 242%-ით გაიზარდა.

„არის შესამჩნევი ნიშნები იმისა, რომ საცალო მოვაჭრეთა აუდიტორია ბაზარზე ბრუნდება. მაგრამ ჯერ-ჯერობით, არა ისეთივე მასშტაბით, როგორც ბოლო ხარების ციკლის დროს. ამას კრიპტოვალუტის კომპანიათა აქციები გვაჩვენებს, რომლებიც ბევრ ტოკენზე უფრო ცვალებადია.“ – განაცხადა Arca-ს ტრეიდერმა კაილ დოანმა (Kyle Doane).

მისივე თქმით, კრიპტოვალუტის ბაზრისა და კრიპტო ბირჟებისთვის საცალო ინვესტორების არსებობა ძალიან მნიშვნელოვანია. მაგალითად, ბოლო ხარების ციკლის დროს, ბირჟა Coinbase-ის შემოსავლების ძირითადი ნაწილი სწორედ საცალო მოვაჭრეებზე მოდიოდა.

თუმცა, საცალო ინვესტორების ფართომასშტაბიან დაბრუნებაზე საუბარი ჯერ კიდევ ნაადრევია. მაგალითისთვის, Coinbase-ის ამ კატეგორიის კლიენტების ვაჭრობის მოცულობა, ბაზრის პიკის პერიოდში – 2021 წლის ბოლოს არსებული მაჩვენებლის მხოლოდ 16%-ს შეადგენს.

ანალიტიკოსების თქმით, ახლა ბევრ მომხმარებელს გაკოტრებული კომპანიებისგან ფულადი სახსრები უბრუნდება და ამ თანხების დიდი ნაწილი შესაძლოა კრიპტოვალუტის ბაზარზე დაბრუნდეს.

„საცალო ვაჭრობის ზრდისთვის რამდნიმე მამოძრავებელი ფაქტორი მკაფიოდ გამოირჩევა. წარსულში საცალო ინვესტორთა მოზიდვის მნიშვნელოვანი ფაქტორი ხალვინგი გახდა.“ – განაცხადა Coinbase-ის ფინანსურმა დირექტორმა ალესია ჰაასმა (Alesia Haas)