სემ ბენკმენ-ფრიდმა სასამართლოს განაჩენი გაასაჩივრა

სემ ბენკმენ-ფრიდმა სასამართლოს განაჩენი გაასაჩივრა

ხუთშაბათს, 11 აპრილს FTX ჯგუფის ყოფილი ხელმძღვანელის, სემ ბენკმენ-ფრიდის ადვოკატებმა ნიუ-იორკის სამხრეთ ოლქის საოლქო სასამართლოს გადაწყვეტილება გაასაჩივრეს.

სემ ბენკმენ-ფრიდის საქმეზე აშშ-ის საოლქო სასამართლოს საბოლოო გადაწყვეტილების გამოცხადების წინ, დაცვის ადვოკატმა მარკ მუკასიმ (Marc Mukasey) განაცხადა, რომ მისი კლიენტი დანაშაულს ინანიებს, მაგრამ გააგრძელებს ბრძოლას საკუთარი უფლებებისთვის და სასამართლოს გადაწყვეტილების მანჰეტენის მე-2 საოლქო სააპელაციო სასამართლოში გასჩივრებას აპირებს. სემ ბენკმენ-ფრიდის ადვოკატებმა სასამართლოსგან აპელაციის განხილვის პერიოდში მათი დაცვის ქვეშ მყოფის ბრუკლინის მეტროპოლიტენის წინასწარი დაკავების ცენტრში დროებით განთავსებაზე თანხმობა მოითხოვეს.

დარგის ექსპერტების აზრით, ბენკმენ-ფრიდის გასაჩივრების განხილვას შესაძლოა წლები დასჭირდეს და მნიშვნელოვანი სამართლებრივი გამოწვევები წარმოიქმნას. მის ადვოკატებს სააპელაციო სასამართლოს კოლეგიის დარწმუნება და შესაძლოა აშშ-ს უზენაესი სასამართლოსთვის მიმართვა მოუწევთ იმის დასამტკიცებლად, რომ აშშ-ის საოლქო მოსამართლემ ლუის კაპლანმა (Lewis Kaplan) სერიოზული პროცედურული შეცდომები დაუშვა, რამაც FTX-ის ყოფილ ხელმძღვანელს კანონით განსაზღვრული უფლებებით სარგებლობის შესაძლებლობა შეუზღუდა და სასამართლო პროცესი უსამართლოდ წარიმართა.

შეგახსენებთ, რომ FTX-ის ყოფილი აღმასრულებელი დირექტორი სემ ბენკმენ-ფრიდი დამნაშავედ თაღლითობის ბრალდებით ცნეს და 25 წლით თავისუფლების აღკვეთა მიუსაჯეს.

მოსამართლე კაპლანმა ბენკმენ-ფრიდის კალიფორნიის ყურის მახლობლად მდებარე საშუალო ან მაქსიმალური უსაფრთხოების ციხეში განთავსების რეკომენდაცია გასცა იმ მოტივით, რომ მისი „უზარმაზარ სიმდიდრესთან კავშირი“ და სოციალური უნარები შესაძლოა სხვა პატიმრების მხრიდან მისდამი აგრესიის მიზეზი გახდეს.