სამხრეთ კორეის მთავრობის ყოველი მეხუთე წარმომადგენელი კრიპტო-ინვესტორია

სამხრეთ კორეის მთავრობის ყოველი მეხუთე წარმომადგენელი კრიპტო-ინვესტორია

სამხრეთ კორეის მთავრობის ეთიკის კომიტეტის ანგარიშის მიხედვით, ქვეყანაში ყოველი მეხუთე საჯარო მოხელე ან დეპუტატი კრიპტოვალუტას ფლობს.

2025 წლის მდგომარეობით, 2047 ოფიციალური პირიდან 411-მა განაცხადა, რომ  კრიპტო აქტივებს ფლობს. ამ აქტივების საერთო მოცულობა 14,41 მილიარდ კორეულ ვონს (9,8 მილიონ აშშ დოლარს) შეადგენს.

კრიპტოვალუტის ყველაზე მსხვილი მფლობელი სეულის საკრებულოს წევრი კიმ ჰი იანგია (Kim Hye-young). მისი კრიპტო პორტფელი 16 კრიპტოვალუტას, მათ შორის BTC, ETH, DOGE და XRP მოიცავს და 1,7 მილიარდ ვონად (1,2 მილიონი აშშ დოლარი) არის შეფასებული.

თავად კიმ ჰი იანგი 0.0014 BTC-ს ფლობს, ხოლო მისი ქმარი 0.01 ETH, 472 DOGE და 519,004 XRP-ის მფლობელია. კრიპტოვალუტა მათ უფროს ვაჟსაც აქვს – მის საფულეში 3336 XRP-ია.

კუთვნილი კრიპტო აქტივების მოცულობით მეორე ადგილს სეულის საქალაქო საბჭოს კიდევ ერთი წევრი ჩოი მინ-გიუ (Choi Min-gyu) იკავებს. მისი კრიპტო აქტივები 1,6 მილიარდ ვონს (1,09 მილიონი აშშ დოლარი) შეადგენს.

მას მოსდევს სახელმწიფო საკუთრებაში არსებული კომპანია Busan-Ulsan Expressway-ის აღმასრულებელი დირექტორი კიმ კი-ჰვანი (Kim Ki-hwan) – მისი კრიპტო აქტივები 1,4 მილიარდ ვონად (დაახლოებით 955,031 აშშ დოლარი) არის შეფასეული.

ზედიზედ მეორე წელია, ოფიციალურ პირებს ციფრული აქტივების ფლობის შესახებ ანგარიშგება ევალებათ. სამხრეთ კორეის ეროვნულმა ასამბლეამ გამჭვირვალობის აქტი 2023 წლის მაისში მიიღო.

კანონი ძალაში 2024 წლის 1 იანვარს შევიდა. ის საჯარო მოხელეებისა და პოლიტიკოსებისგან ფინანსურ გამჭვირვალობას მოითხოვს.

კანონი მაღალჩინოსნებს მათი კუთვნილი კრიპტო აქტივების ტიპისა და ოდენობის გასაჯაროებას ავალდებულებს. ისევე როგორც ტრანზაქციების ჩანაწერების გასაჯაროებას და იმის ახსნა-განმარტებას, თუ როგორ მოხდა აქტივების შეძენა.

საშუალო დონის საჯარო მოხელეებს მხოლოდ რაოდენობის გასაჯაროება მოეთხოვებათ.

გასულ კვირას რეგისტრაციის არარსებობის მიზეზით სამხრეთ კორეის ხელისუფლებამ კრიპტო ბირჟების KuCoin-ისა და BitMEX-ის საქმიანობის გამოძიება დაიწყო.

თებერვალში სამხრეთ კორეის პროკურატურამ თაღლითობისა და კრიპტოვალუტის დანაშაულებებთან საბრძოლველად სპეციალური დანაყოფი შექმნა.