ევროპამ Binance-ს შეზღუდვები დაუწესა

კრიპტო ბირჟა Binance კრიპტოვალუტის დერივატივებით ვაჭრობას ჯერ გერმანიაში, იტალიასა
და ნიდერლანდებში, შემდეგ კი მთელს ევროპაში შეწყვეტს. ქვეყანაში ყველა ოპერაციის დახურვის
მოთხოვნა კრიპტობირჟას მალაიზიამაც წამოუყენა.

Binance-ის საიტზე გამოქვეყნებული განცხადების თანახმად, ბირჟის მომხმარებლებმა ზემოთხსენებული
ქვეყნებიდან  კრიპტოვალუტის ფიუჩერსებზე პოზიციები 90 დღის განმავლობაში უნდა დახურონ.
ახალ მომხმარებლებს აკრძალვა დაუყოვნებლივ შეეხებათ – ტრეიდერები კრიპტოვალუტებზე დაფუძნებული
წარმოებული ფინანსური ინსტრუმენტებისთვის ახალი ანგარიშების გახსნას ვეღარ შეძლებენ. 

Binance ტვიტერზე იუწყება, რომ ევროპის ტერიტორიაზე ფიუჩერსებსა და დერივატივებზე წვდომის
შეზღუდვა იგეგმება, რადგან ევროპაში ამ პროდუქტების განვითარება კომპანიის გეგმებში არ შედის. 

შეზღუდვები კრიპტობირჟამ ევროპელი მარეგულირებლების, მათ შორის გერმანიისა და იტალიის
ზეწოლის ფონზე შემოიღო. ივლისის შუა რიცხვებში იტალიის კომპანიებისა და ბირჟების კომისიამ
(CONSOB) განაცხადა, რომ Binance Group-სა და მის შვილობილ კომპანიებს ქვეყნის ტერიტორიაზე
საქმიანობისა და მისი მოქალაქეებისთვის ინვესტიციებთან დაკავშირებული მომსახურებების გაწევის
უფლება არ აქვს. ბოლო თვეების მანძილზე კრიპტობირჟამ მსგავსი გაფრთხილებები კიდევ რამდენიმე
ქვეყნის ფინანსური მარეგულირებლებისგან მიიღო, მათ შორის დიდი ბრიტანეთისგანაც (FCA).

Binance აღნიშნავს, რომ ევროპა ბირჟის შემდგომი განვითარებისთვის მნიშვნელოვან ბაზარს წარმოადგენს,
ამიტომ პლატფორმა კრიპტოვალუტების რეგულირების „ჰარმონიზაციისთვის“ საჭირო ზომებს მიიღებს.
მარეგულირებლებთან რთული ურთიერთობების მიუხედავად, ბირჟის ხელმძღვანელობა დარწმუნებულია,
რომ მათი მხრიდან კრიპტოვალუტებისადმი ასეთი ყურადღება მთელი ინდუსტრიისთვის პოზიტიურ ნიშნად
შეიძლება ჩაითვალოს. Binance-მა მარეგულირებელი ორგანოების მოთხოვნების დაკმაყოფილებისა და მათთან
კონსტრუქციული დიალოგის გამართვისთვის მზაობა კიდევ ერთხელ გამოთქვა. 

გარდა ამისა, გავრცელებული განცხადებით Binance-ს ქვეყანაში ყველა სახის ოპერაციის შეწყვეტისკენ
მალაიზიის ფასიანი ქაღალდების კომისიამაც (SCM) მოუწოდა. განცხადებაში ნათქვამია, რომ ბირჟამ და
მისმა შვილობილმა კომპანიებმა მალაიზიის მოქალაქეებისთვის  საიტებსა და აპლიკაციებზე წვდომა უნდა
გააუქმონ და შეწყვიტონ ყოველგვარი საქმიანობა. განკარგულება შეეხო ბრიტანულ ფირმას
Binance Digital Limited, ლიტვურ Binance UAB-ს  და სინგაპურში რეგისტრირებულ Binance Asia Services Pte Ltd-ს.

ა.წ 26 ივლისიდან Binance ვალდებულია განკარგულებაში მითითებული პირობები 14 სამუშაო დღის ვადაში შეასრულოს. SCM ასევე მოუწოდებს საკუთარ მოქალაქეებს თავი შეიკავონ იმ კრიპტოვალუტის ბირჟებზე ვაჭრობისგან, რომლებიც ქვეყანაში უკანონო საქმიანობას ეწევიან.

წყარო: https://bits.media