by Maria 
Bloomberg Businessweek-მა Binance-ს საჯარო ბოდიში მოუხადა
ჟურნალ Bloomberg Businessweek-ის ჩინურმა ფილიალმა კრიპტოვალუტის ბირჟა Binance-ს და მის თანადამფუძნებელ ჩენპენ ჯაოს ცილისმწამებლური ინფორმაციის გამოქვეყნებისთვის ოფიციალურად ბოდიში მოუხადა.
საქმე ეხება 2022 წლის მოვლენებს, როდესაც Binance-ის ყოფილმა აღმასრულებელმა დირექტორმა, Bloomberg BusinessWeek-ის შვილობილი კომპანიის, გამომცემლობა Modern Media-ს წინააღმდეგ ცრუ ინფორმაციის გავრცელების ბრალდებით სარჩელი შეიტანა.
2022 წელს Modern Media-მ მასალა გამოაქვეყნა, რომელშიც კრიპტოვალუტის პლატფორმა და მისი ყოფილი ხელმძღვანელი თაღლითობასა და პონცის სქემის ორგანიზებაში დაადანაშაულა.
„ 2022 წლის 6 ივლისით დათარიღებულ ჩვენს 250-ე ნომერში, ჩვენ აშკარა შეცდომა დავუშვით და ყალბი და საფუძველს მოკლებული სათაურით „ჩენპენ ჯაოს თაღლითობა“ კრიპტო ბირჟა Binance-ისა და მისი ხელმძღვანელის საქმიანობის შესახებ სტატია გამოვაქვეყნეთ. ჩვენ შეცდომა დავუშვით და მიყენებული ფინანსური და მორალური ზიანისთვის უპირობოდ ბოდიშს ვიხდით.“- ნათქვამია მედიაში გავრცელებულ ოფიციალურ განცხადებაში.
გამოცემამ ისიც დასძინა, რომ კომპენსაციის სახით, მედია პლატფორმა ნებაყოფლობით შემოწირულობებს ჰუბეი სონჯის პროვინციის სპეციალური განათლების ფონდს გადასცემს. თუმცა, შემოწირულობების ოდენობა არ დასახელებულა.
