აშშ-ში კრიპტო ტრანზაქციები დაიბეგრება

აშშ-ში კრიპტო ტრანზაქციები დაიბეგრება

აშშ-ს დემოკრატიული პარტიის ნიუ-იორკის შტატის ასამბლეის კონგრესმენმა ფილ სტეკმა (Phil Steck) წარადგინა კანონპროექტი, რომელიც კრიპტოვალუტების, მათ შორის არაგაცვლადი ტოკენების (NFT) გაყიდვასა და გადაცემაზე დაბეგვრას ითვალისწინებს. კონგრესმენის თქმით, გადასახადს ყოველწლიურად 158 მილიონი დოლარის მობილიზება შეეძლება.

კანონპროექტის თანახმად, ციფრულ აქტივებთან დაკავშირებული ნებისმიერი ტრანზაქცია გადარიცხული თანხის 0.2%-ის სპეციალურ საკომისიოს დაექვემდებარება. შეგროვებული გადასახადები ადგილობრივ სკოლებში ნარკომანიის წინააღმდეგ ბრძოლის პრევენციული პროგრამების დაფინანსებას მოხმარდება.

კანონპროექტს განხილვის რამდენიმე ეტაპის გავლა მოუწევს. პირველ რიგში, ის ასამბლეაში კენჭისყრაზე უნდა გავიდეს, შემდეგ კი სენატში გადაიგზავნოს. სენატის მიერ ინიციატივის დამტკიცების შემთხვევაში, დოკუმენტი გუბერნატორს გაეგზავნება, რომელსაც შეუძლია ხელი მოაწეროს კანონპროექტს ან ვეტო დაადოს. თუ კანონპროექტი წარმატებით დამტკიცდება, კრიპტოვალუტით განხორციელებული ყველა ტრანზაქცია 1 სექტემბრიდან დაიბეგრება.

ნიუ-იორკში სათავო ოფისები არაერთმა კრიპტო კომპანიამ დაარეგისტრირა: სტეიბლკოინების Circle-სა და Paxos-ის ემიტენტებმა, კრიპტოვალუტის ბირჟამ Gemini და ანალიტიკურმა კომპანიამ Chainalysis. ნიუ-იორკი აშშ-ის პირველი შტატი გახდა, რომელმაც კრიპტოვალუტის რეგულირების რეჟიმი შემოიღო. 2015 წლიდან შტატში მოქმედი ინდუსტრიული კომპანიები ვალდებულნი არიან მიიღონ ლიცენზია BitLicense, რომელსაც ნიუ-იორკის ფინანსური მომსახურების დეპარტამენტი (NYDFS) გასცემს.

მაისში, ნიუ-იორკის მერმა ერიკ ადამსმა (Eric Adams) ლიცენზირების გაუქმება მოითხოვა და განაცხადა, რომ კრიპტო კომპანიებისთვის ლიცენზიის მოპოვების მოთხოვნები ძალიან მკაცრი იყო.