by Maria 
ბლოკჩეინ გადახდის გადაწყვეტილებები SWIFT-ს ბოლოს მოუღებს
Cardano-ს დამფუძნებელმა ჩარლზ ჰოსკინსონმა (Charles Hoskinson) საერთაშორისო საბანკო გადარიცხვების სისტემა SWIFT-ის მაგალითზე ტრადიციული გადახდის სისტემები გააკრიტიკა და განაცხადა, რომ ისინი მალე არსებობას შეწყვეტენ.
ჟურნალ David Lin Report-თან ინტერვიუში ჰოსკინსონმა განაცხადა, რომ ტრადიციული ფინანსური სისტემების „გაქრობის“ მიზეზი მათი არაეფექტურობაა. ბიზნესმენის თქმით, მათ ბევრი ხარვეზი აქვთ და მომხმარებლებს მაღალ მოთხოვნებს უყენებენ, რაც ფულის გადარიცხვის პროცესს ართულებს და მომხმარებელთა გაღიზიანებას იწვევს.
საბანკო გადარიცხვის შესრულება პირადი ინფორმაციის არაერთგზის გამჟღავნებისა და თაღლითობაზე შემოწმების პროცედურებს მოიცავს. ზოგჯერ გადარიცხვის დასადასტურებლად ფინანსურ ინსტიტუტებს თანხის გამგზავნთან დაკავშირება უწევთ. გაძლიერებული უსაფრთხოების ზომების მიუხედავად, ტრადიციული ფინანსური სისტემები თაღლითობის მიმართ კვლავ დაუცველია, აღნიშნავს ჰოსკინსონი. მისი მტკიცებით, ბლოკჩეინ გადაწყვეტილებების საშუალებით თანხების გაგზავნა გაცილებით იაფი და უსაფრთხოა.
მას მაგალითად ელექტრონული საფულიდან გადარიცხვების შესრულება მოჰყავს, რომლის დროსაც Android ან iOS მოწყობილობიდან ბიომეტრიული იდენტიფიკაციის წყალობით, სისტემის მხრიდან მომხმარებლის ვინაობის დადასტურება მყისიერად ხდება. ტრადიციული გადახდის სისტემები უკვე მოძველებულია, ამიტომ ალტერნატიული ბლოკჩეინზე დაფუძნებული გადაწყვეტილებების ფონზე, ისინი ქმედითუნარიანობას დაკარგავენ.
ჰოსკინსონის აზრს აშშ-ის პრეზიდენტის, დონალდ ტრამპის ვაჟი, ერიკ ტრამპიც იზიარებს. მან ცოტა ხნის წინ განაცხადა, რომ თუ ტრადიციული ბანკები ბლოკჩეინს არ დანერგავენ, მომდევნო ათწლეულში მათ გაქრობა ემუქრებათ.
