by Maria 
ერიკ ტრამპმა სტეიბლკოინებს დოლარის სამაშველო რგოლი უწოდა
აშშ-ის პრეზიდენტის დონალდ ტრამპის ვაჟის ერიკ ტრამპის განცხადებით, სტეიბლკოინები აშშ დოლარს გადაარჩენს, მაგრამ მათ მიერ სახელმწიფო ვალუტის სრული ჩანაცვლება ვერ მოხდება.
როგორც Trump Organization-ის აღმასრულებელმა ვიცე-პრეზიდენტმა New York Post-ს განუცხადა, სტაბილური კრიპტოვალუტები არა თუ მოსპობს ან შეასუსტებს აშშ დოლარს, არამედ პირიქით, გააძლიერებს მას.
ერიკ ტრამპმა კერძოდ სტეიბლკოინი USD1 ახსენა, რომელსაც აშშ დოლარის მხარდაჭერა აქვს. ეს ტოკენი დეცენტრალიზებულ პლატფორმა World Liberty Financial-ს ეკუთვნის. იმის გათვალისწინებით, რომ ეს დონალდ ტრამპის ოჯახის პლატფორმაა, ის ვაშინგტონში დემოკრატი კანონმდებლების განსაკუთრებული ყურადღების საგანი გახდა.
ერიკ ტრამპის ეს განცხადება დემოკრატი კონგრესმენის მაქსინ უოტერსის (Maxine Waters) შეშფოთებას მოჰყვა. მაქსინის განცხადებით, პრეზიდენტი დონალდ ტრამპი დოლარის თავისი სტაბილური კრიპტოვალუტით, USD1-ით ჩანაცვლებას გეგმავს.
ტრამპის ინტერესთა კონფლიქტზე კრიპტოვალუტის მოწინააღმდეგე მასაჩუსეტსის შტატის დემოკრატმა სენატორმა ელიზაბეტ უორენმაც (Elizabeth Warren) ისაუბრა . მან აღნიშნა, რომ ტრამპის მიერ USD1-ისა და სხვა კრიპტო ინიციატივების ამოქმედებიდან ტრამპის პირადი ქონება 2 მილიარდ დოლარზე მეტით გაიზარდა. უორენის განცხადებით, ცოტა ხნის წინ მიღებული აქტი GENIUS , რომელიც სტაბილური კრიპტოვალუტების გამოშვებას და მიმოქცევას არეგულირებს, პრეზიდენტს და მის ოჯახს USD1-ისგან ფინანსური სარგებლის მიღებაში ხელს არ შეუშლის.
ცოტა ხნის წინ ერიკ ტრამპმა ბიტკოინის მიმართ თავისი მხარდაჭერა გამოთქვა და აღნიშნა, რომ კრიპტოვალუტა, რომელიც ადრე ძირითადად ინდივიდუალურ ინვესტორებში იყო პოპულარული, ახლა მსხვილი კომპანიების ინტერესს იპყრობს. ერიკ ტრამპის პროგნოზით, მომდევნო 18 თვის განმავლობაში კრიპტოვალუტის ბაზარი მკვეთრ ზრდას განიცდის.
სიახლეების გამოწერა
