ბანკები კრიპტო ბირჟებს დაუპირისპირდნენ

ბანკები კრიპტო ბირჟებს დაუპირისპირდნენ

კრიპტოვალუტის ბირჟა Kraken-ის აღმასრულებელმა დირექტორმა, დეივ რიპლიმ (Dave Ripley), ბანკების მხრიდან კრიპტო პლატფორმებისთვის მომხმარებლებზე სტეიბლკოინების პროცენტების გადახდის აკრძალვის მცდელობა გააკრიტიკა.

რიპლის მტკიცებით, მომხმარებლებს თავისუფალი არჩევანის შესაძლებლობა უნდა ჰქონდეთ – მათი არჩევანი მხოლოდ საბანკო პროცენტების მიღებით არ უნდა შემოიფარგლებოდეს და უნდა შეეძლოთ სარგებელი სტეიბლკოინების ფლობის შემთხვევაშიც მიიღონ. მათ თავად უნდა შეეძლოთ არჩევა სად შეინახონ თავიანთი აქტივები და როგორ მართონ ისინი ყველაზე ეფექტურად. Kraken-ის აღმასრულებელი დირექტორის თქმით, ტრადიციული ბანკები მოგებას სხვისი ფულით ნახულობენ ისე, რომ საკუთარ კლიენტებს არ აძლევენ შესაძლებლობას სარგებელი თავადაც მიიღონ.

„კრიპტოვალუტის ბირჟები ქმნიან რაღაც სხვას – სისტემას, რომელშიც წარსულში მხოლოდ მდიდრებისთვის განკუთვნილი სერვისები ახლა ყველასთვის ხელმისაწვდომი იქნება.“- თქვა რიპლიმ.

ეს განცხადებები მან ამერიკის საბანკო ასოციაციის (ABA) სტრატეგიული ინოვაციების უფროსი ვიცე-პრეზიდენტის ბრუკ იბარას (Brooke Ybarra) საპასუხოდ გააკეთა, რომლის მტკიცებით, Kraken-ის ან Coinbase-ის მსგავსი კრიპტო ბირჟებისთვის პროცენტის გადახდის ნებართვის მიცემა ეწინააღმდეგება იმ აზრს, რომ სტეიბლკოინები გადახდებისთვის უნდა იქნას გამოყენებული და არა დანაზოგის შესანახად. იბარა შიშობს, რომ სტეიბლკოინების პროცენტის გადახდა ბანკებზე უარყოფითად აისახება.

ბანკებსა და კრიპტოვალუტის ბირჟებს შორის უთანხმოება მას შემდეგ დაიწყო, რაც აშშ-ის პრეზიდენტმა დონალდ ტრამპმა ხელი მოაწერა Genius-ის აქტს, ყოვლისმომცველ მარეგულირებელ ჩარჩოს, რომელიც სტეიბლკოინების გამოშვებასა და მიმოქცევას არეგულირებს და მათ ფართოდ გავრცელებას უწყობს ხელს. კანონის თანახმად, სტეიბლკოინების ემიტენტებს მათზე პროცენტის გადახდა ეკრძალებათ, თუმცა ეს შეზღუდვები კრიპტო ბირჟებზე არ ვრცელდება.

ბანკების შეშფოთებასთან დაკავშირებით კომენტარი ცოტა ხნის წინ აშშ-ს ვალუტის კონტროლის ოფისის (OCC) ხელმძღვანელმა ჯონათან გოულდმა (Jonathan Gould) გააკეთა. მისი მტკიცებით, სტეიბლკოინები ბანკებიდან დეპოზიტების მყისიერ გადინებას არ გამოიწვევს.

წყარო: https://cointelegraph.com/news/stablecoins-yield-banks-interest-kraken-ceo-dave-ripley