ჩრდილოეთ კორეა კრიპტოვალუტის ლეგალიზაციას რუსეთისა და აზიის მეშვეობით ახდენს

ჩრდილოეთ კორეა კრიპტოვალუტის ლეგალიზაციას რუსეთისა და აზიის მეშვეობით ახდენს

ჩრდილოეთ კორეელმა ჰაკერებმა 2024 წლის იანვრიდან 2025 წლის სექტემბრამდე პერიოდში 2.837 მილიარდი დოლარის ღირებულების კრიპტოვალუტა მოიპარეს. გაეროს სანქციების მონიტორინგის ჯგუფის (MSMT) ექსპერტების თქმით, თანხების უმეტესი ნაწილის გათეთრება რუსეთში, ჰონგ-კონგსა და კამბოჯაში შუამავლების მეშვეობით მოხდა.

გაეროს ექსპერტებმა ჩრდილოეთ კორეელი ჰაკერების მთავარ სამიზნედ მსხვილი ცენტრალიზებული კრიპტო ბირჟები დაასახელეს. MSMT-ის წარმომადგენლების თქმით, კიბერდამნაშავეებმა მჭიდრო კავშირები დაამყარეს რუსულ ჯგუფებთან, რომლებიც გამომძალველი პროგრამების შემუშავებით არიან დაკავებული.

ჩრდილოეთ კორეისთვის რუსეთში, ლაოსში, კამბოჯასა და აფრიკის ქვეყნებში, დისტანციურად, ყალბი სახელებით სულ მცირე 2000 პროგრამისტი მუშაობს. გაეროს ორგანიზაციის ექსპერტების თქმით, ისინი ხელფასს სამშობლოში სამხედრო პროგრამების დასაფინანსებლად რიცხავენ.

სიტუაციას ის ფაქტი ართულებს, რომ ფხენიანის კიბერ დანაყოფებმა კრიპტოვალუტის ქურდობის პრაქტიკულად ყველა ეტაპზე ხელოვნური ინტელექტის გამოყენება დაიწყეს: დაზვერვა, ფიშინგი, კოდის ანალიზი, ქურდობა და მოპარული ციფრული კრიპტოვალუტების გათეთრება. MSMT-ის ექსპერტების თქმით, ChatGPT-ისა და Claude-ის მსგავსი მოდელების გამოყენებით, ბოროტმოქმედები ბლოკჩეინის ღია კოდის ანალიზს ახდენენ, პოულობენ კრიპტო ბირჟის ხარვეზს და ძარცვის წარმატებული მეთოდები ერთი ეკოსისტემიდან მეორეში გადააქვთ.

გაეროს ექსპერტების აზრით, საერთაშორისო თანამშრომლობისა და ერთიანი კიბერუსაფრთხოების სტანდარტების შექმნის გარეშე, ვირტუალური აქტივების ქურდობის ასეთი სქემები მხოლოდ გაფართოვდება, რაც საფრთხეს არა მხოლოდ კრიპტო ბაზარს, არამედ გლობალურ ფინანსურ სტაბილურობას შეუქმნის.

წყარო: https://msmt.info/Publications/detail/MSMT%20Report/4221