სასამართლომ Terraform Labs-ის დამფუძნებელს განაჩენი გამოუტანა

სასამართლომ Terraform Labs-ის დამფუძნებელს განაჩენი გამოუტანა

ნიუ-იორკის სამხრეთ ოლქის სასამართლომ Terraform Labs-ის დამფუძნებელს დო კვონს (Do Kwon) 15 წლით თავისუფლების აღკვეთა მიუსაჯა თაღლითობისთვის, რამაც ტოკენ LUNA-ს და ალგორითმული სტეიბლკოინის TerraUSD-ის კოლაფსი გამოიწვია. ამის შედეგად, ინვესტორებმა დაახლოებით 40 მილიარდი დოლარი დაკარგეს.

ფედერალური ოლქის მოსამართლე პოლ ენგელმაიერმა (Paul Engelmayer) ინვესტორებისთვის მიყენებული კოლოსალური ფინანსური ზარალის მოტივით, ბრალდებულს პროკურორების მოთხოვნაზე მეტი ვადა მიუსაჯა.

პროკურორები 12 წლით თავისუფლების აღკვეთას ითხოვდნენ, კვონის ადვოკატები კი ვადის ხუთ წლამდე შემცირებას.

პროკურორების განცხადებით, TerraUSD-ის ვარდნამ ჯაჭვური რეაქცია წარმოქმნა, რამაც 2022 წელს რამდენიმე კრიპტოვალუტის კომპანიის გაკოტრება გამოიწვია.

ბრალდების მხარის მტკიცებით, კვონმა მის ეკოსისტემასთან დაკავშირებული რისკების არარსებობის შესახებ მოიტყუა. თუმცა, დაცვის მხარის მტკიცებით, კვონს TerraUSD-ის ფასის სტაბილიზება სურდა და ინვესტორების მოტყუების განზრახვა არ ჰქონია.

სასამართლო სხდომაზე კვონმა დაზარალებულებს ბოდიში მოუხადა და აღიარა, რომ ის თავისი ქმედებებისთვის უნდა დაისაჯოს.

კვონს ბრალი რამდენიმე მუხლით 2023 წლის მარტში წაუყენეს.

მოგვიანებით, კვონმა დანაშაული აღიარა. საპროცესო შეთანხმების გარეშე, კვონს ყველა ბრალდებაში ბრალის დამტკიცების შემთხვევაში 135 წლით თავისუფლების აღკვეთა, ხოლო დანაშაულის აღიარების შემთხვევაში 25 წლით თავისუფლების აღკვეთა ემუქრებოდა.

2023 წლის მარტში კვონი მონტენეგროს აეროპორტში ყალბი დოკუმენტებით დააკავეს. შეერთებული შტატებისა და სამხრეთ კორეის სამართალდამცავებმა მისი ექსტრადიცია მოითხოვეს.

საბოლოოდ, 2024 წლის დეკემბერში კვონის ექსტრადირება შეერთებულ შტატებში მოხდა. განაჩენის გამოტანის შემდეგ, კვონმა სამხრეთ კორეაში გადაყვანის მოთხოვნის წარდგენამდე სასჯელის მინიმუმ ნახევარი უნდა მოიხადოს. მას მონტენეგროს ციხეში გატარებული 17 თვე ჩაეთვლება.

წყარო: https://www.theblock.co/post/382204/terraform-labs-founder-do-kwon-sentenced-to-15-years-over-40-billion-terra-luna-collapse-inner-city-press