ქეროლაინ ელისონს ციხიდან ვადაზე ადრე გაათავისუფლებენ

ქეროლაინ ელისონს ციხიდან ვადაზე ადრე გაათავისუფლებენ

Alameda Research-ის ყოფილ აღმასრულებელ დირექტორს ქეროლაინ ელისონს ციხიდან ვადაზე ადრე გაათავისუფლებენ.

აშშ-ის ციხეების ფედერალური ბიუროს (BOP) ინფორმაციით, სამი წლის წინ გაკოტრებული კრიპტო ბირჟა FTX-ის შვილობილი კომპანიის, ჰეჯ-ფონდ Alameda Research-ის ყოფილი ხელმძღვანელი, ქეროლაინ ელისონი (Caroline Ellison) 2026 წლის იანვარში პირობით ვადამდე გათავისუფლდება.

ყოფილ ტოპ-მენეჯერს 2024 წლის სექტემბერში ორწლიანი პატიმრობა მას შემდეგ მიესაჯა, რაც იგი იმ დროისთვის მსოფლიოში ერთ-ერთი უდიდესი კრიპტოვალუტის ბირჟის გაკოტრებასთან დაკავშირებულ თაღლითობაში თანამონაწილეობაში დამნაშავედ ცნეს.

მოსამართლე ლუის კაპლანმა (Lewis Kaplan) ელისონის განაჩენის გამოტანისას განაცხადა, რომ გახმაურებულმა დანაშაულმა ციფრული აქტივების მფლობელებს მილიარდობით დოლარის ზარალი მოუტანა და კრიპტოვალუტის ინდუსტრიას გამოუსწორებელი ზიანი მიაყენა.

Alameda-ს ყოფილი ხელმძღვანელის ვადაზე 10 თვით ადრე გათავისუფლება გამოძიებასთან მის „უპრეცედენტო თანამშრომლობას“ უკავშირდება, რომლის გარეშეც FTX-ის აღმასრულებლების დანაშაულის დამტკიცება გაცილებით რთული იქნებოდა.

ელისონმა FTX-ის დამფუძნებლის, სემ ბენკმენ-ფრიდის (Sam Bankman-Fried) წინააღმდეგ ჩვენება მისცა და ასევე გაკოტრებული ბირჟის დროებით ადმინისტრაციას დაფარული აქტივების პოვნაში ეხმარებოდა. ბირჟის ამჟამინდელმა აღმასრულებელმა დირექტორმა, ჯონ ჯ. რეი III-მ (John J. Ray III) სასამართლოს განუცხადა, რომ ელისონის ღირებული ინფორმაცია ასობით მილიონი დოლარის დაბრუნებაში დაეხმარათ.

მანამდე, FTX-ის ყოფილმა აღმასრულებელმა დირექტორმა, სემ ბენკმენ-ფრიდმა განაცხადა, რომ მისი კომპანია გადახდისუუნარო არასდროს ყოფილა. მან კრიპტო ბირჟის გაკოტრების რეალურ მიზეზად დროებითი ადმინისტრაციის საბოტაჟი და არაკომპეტენტურობა დაასახელა.

წყარო: https://www.theblock.co/post/383754/caroline-ellison-prison-release-ftx