ჰაკერებმა საფრანგეთის საგადასახადო ორგანოს კრიპტოვალუტის ანგარიშგების პლატფორმა გატეხეს
by Giorgi 
ჰაკერებმა საფრანგეთის საგადასახადო ორგანოს კრიპტოვალუტის ანგარიშგების პლატფორმა გატეხეს
უცნობმა პირებმა გატეხეს ფრანგული პლატფორმა Waltio, რომელსაც კრიპტოინვესტორები საგადასახადო ანგარიშების მოსამზადებლად იყენებენ.
პარიზის პროკურატურამ და საფრანგეთის ინფორმაციული სისტემების უსაფრთხოების სააგენტომ (ANSSI), პლატფორმის დეველოპერებთან ერთად, ჰაკერულ თავდასხმასთან დაკავშირებული გამოძიების დაწყების შესახებ გამოაცხადეს. წინასწარი გამოძიების თანახმად, ინციდენტმა შესაძლოა Waltio-ზე შენახულ 50 000 ადამიანის პერსონალურ მონაცემებს საფრთხე შეუქმნას. პლატფორმას ბიტკოინსა და სხვა ციფრულ აქტივებში ინვესტიციების მქონე დაახლოებით 150 000 ბიზნესმენი იყენებს, რომელთა უმეტესობა საფრანგეთში ცხოვრობს.
Le Parisien-ის ცნობით, პლატფორმაზე თავდასხმის უკან ჰეკერთა ჯგუფი Shiny Hunters დგას. დამნაშავეთა ჯგუფმა Waltio-ს გამოსასყიდი მოსთხოვა.
ANSSI იტყობინება, რომ ექსპერტები მოპარული მონაცემების ბუნებასა და მსხვერპლთა ვინაობას ადგენენ. სამართალდამცავი ორგანოების ვარაუდით, დამნაშავეებმა შესაძლოა თავი საგადასახადო სამსახურის ან Waltio-ს თანამშრომლებად გაასაღონ და კრიპტო ინვესტორები მათთვის ციფრული აქტივების გადაცემაში დაარწმუნონ. საფრანგეთის ხელისუფლება შიშობს, რომ კრიპტო ინვესტორები, რომელთა მონაცემებიც მოიპარეს, შესაძლოა გატაცების, თავისუფლების უკანონოდ შეზღუდვის ან ახლო ნათესავების მიმართ მუქარის საშიშროების პირისპირ აღმოჩნდნენ.
ჰაკერული თავდასხმა საგადასახადო სამსახურის თანამშრომელი ქალის დაკავებიდან ერთ თვეზე ნაკლებ დროში მოხდა. ქალს ბრალი კრიპტოვალუტის მსხვილი მფლობელების შესახებ ინფორმაციის კრიმინალური დაჯგუფებებისთვის გადაცემაში ედება. ქალის დაპატიმრება ინვესტორებსა და მათ ნათესავებზე თავდასხმების სერიას მოჰყვა, რომლის დროსაც კრიმინალებმა გაიტაცეს ან მძევლად აიყვანეს კონკრეტული ინვესტორები ან მათი ნათესავები და ზოგჯერ ძალადობის გზით, მათ ციფრული აქტივების გადაცემას აიძულებდნენ.
სიახლეების გამოწერა
