by Giorgi 
ტრამპების ოჯახის USD1 სტეიბლკოინების ტოპ ხუთეულში შევიდა
აშშ-ის პრეზიდენტის, დონალდ ტრამპის ოჯახის კომპანიის, World Liberty Financial-ის დოლარში დენომინირებულმა სტეიბლკოინმა USD1 გამოშვებიდან ერთ წელზე ნაკლებ დროში 5 მილიარდი დოლარის საბაზრო კაპიტალიზაციას მიაღწია და მსოფლიოში სიდიდით მეხუთე სტაბილური კრიპტოვალუტა გახდა.
USD1-ის ზრდას World Liberty Financial-ის მიერ სატრასტო ბანკის დაარსების მიზნით აშშ-ის ვალუტის კონტროლის ოფისში (OCC) შეტანილმა განაცხადმა შეუწყო ხელი. განაცხადის დამტკიცების შემთხვევაში, კომპანიას USD1 მონეტების გამოშვება, კონვერტაცია და შენახვა ფედერალური ზედამხედველობის ქვეშ შეეძლება.
„შექმნილია ამერიკაში, შემუშავებულია პრაქტიკული მიზნებისთვის და გამოიყენება სერიოზული ორგანიზაციების მიერ. აი, რა ხდება, როდესაც ყურადღებას ინფრასტრუქტურაზე ამახვილებ და არა ხმაურზე.“- განაცხადა World Liberty Financial-ის თანადამფუძნებელმა, პრეზიდენტ დონალდ ტრამპის ვაჟმა დონალდ ტრამპ უმცროსმა.
USD1-მ ტრამპს აშშ-ის კანონმდებლების მხრიდან პრობლემები შეუქმნა. გაისმა ბრალდებები ინტერესთა კონფლიქტის შესახებ, მათ შორის, მასაჩუსეტსის შტატის დემოკრატი სენატორის, ელიზაბეტ უორენის (Elizabeth Warren) მხრიდან. უორენის მტკიცებით, იმის გამო, რომ სტეიბლკოინით ვაჭრობა დეცენტრალიზებულ ბირჟა PancakeSwap-ზე ხდება, შესაძლოა აშშ-ის ეროვნულ უსაფრთხოებას ზიანი მიადგეს. სენატორის თქმით, ზემოთხსენებული პლატფორმის მეშვეობით ჩრდილოეთ კორეელ ჰაკერებთან დაკავშირებული 263 მილიონი დოლარის გათეთრება მოხდა.
Bloomberg-ის ცნობით, ტრამპმა კრიპტოპროექტებიდან დაახლოებით 1.4 მილიარდი დოლარი გამოიმუშავა, რაც ოჯახის მთლიანი ქონების დაახლოებით მეხუთედს შეადგენს. Trump Media-მ ცოტა ხნის წინ საკუთარი ტოკენების გამოშვების შესახებ გამოაცხადა.
პარალელურად, ბლოკჩეინ Solana-ზე შექმნილი მემკოინი Official Trump (TRUMP) სულ რაღაც ერთ წელიწადში ყველა დროის მაქსიმუმთან, 75 დოლართან შედარებით 94%-ზე მეტით დაეცა. ამჟამად ტოკენის ფასი 4.66 დოლარს შეადგენს. მისი საბაზრო კაპიტალიზაცია კი 928.7 მილიონი დოლარია.
წყარო: https://x.com/DonaldJTrumpJr/status/2016603533320069295
სიახლეების გამოწერა
