by Giorgi 
Morgan Stanley კრიპტო ბანკის გახსნას გეგმავს
ფინანსურმა ჯგუფმა Morgan Stanley აშშ-ის ვალუტის კონტროლის ოფისში (OCC) კრიპტოვალუტით ტრანზაქციებზე სპეციალიზირებული სატრასტო ბანკის შექმნის მოთხოვნით განაცხადი შეიტანა.
განაცხადის თანახმად, Morgan Stanley-ის შვილობილი ბანკი მომხმარებლებს ციფრული ტოკენების შენახვის, შეძენის, გაყიდვის, გადაცემისა და გაცვლის სერვისებს შესთავაზებს. ბანკი ასევე სტეიკინგის სერვისების შეთავაზებას გეგმავს.
Morgan Stanley-მ კრიპტო ბანკის შექმნის შესახებ გადაწყვეტილება მომხმარებლების საკუთრებაში არსებული „კრიპტოაქტივების მნიშვნელოვანი მოცულობით“ ახსნა, რომელიც სრულად არა ფინანსური ჯგუფის პლატფორმებზე, არამედ მესამე მხარის პროვაიდერებთან ინახება.
ჰოლდინგმა ადრე საკუთარი კრიპტო საფულის გამოშვების გეგმების შესახებ გამოაცხადა, სადაც მომხმარებლებს კრიპტოვალუტების და ტოკენიზებული უძრავი აქტივების, მათ შორის ტოკენიზებული აქციების შენახვა შეეძლებათ.
კომპანია River-ის ბოლოდროინდელმა კვლევამ აჩვენა, რომ აშშ-ის 25 უმსხვილესი ბანკიდან ნახევარზე მეტმა მომხმარებლებს კრიპტო მომსახურება ან უკვე შესთავაზა, ან შეთავაზება დააანონსა.
ამჟამად, Morgan Stanley ციფრული ვალუტით ვაჭრობის ტესტირებას მომხმარებელთა შერჩეულ კატეგორიაზე ახდენს, მაშინ, როცა მისმა ზოგიერთმა კონკურენტმა, როგორიცაა Citigroup, მომხმარებლებს ბიტკოინის შენახვის შესაძლებლობა უკვე შესთავაზა.
კრიპტოვალუტით ვაჭრობის დაწყების შესახებ ცოტა ხნის წინ ასევე აშშ-ის ერთ-ერთმა უმსხვილესმა ბანკმა JPMorgan-მაც გამოაცხადა.
კრიპტო სერვისების ამოქმედება კრიპტოვალუტის რეგულირების კანონპროექტ CLARITY-სთან დაკავშირებით მიმდინარე დავის ფონზე ხორციელდება.
კონგრესის მიერ კანონპროექტის განხილვა სტეიბლკოინების შემოსავლიანობასთან დაკავშირებული დისკუსიების მიზეზით შეფერხდა. მსხვილი ბანკები და საბანკო ასოციაციები მომხმარებლებისთვის სტაბილური კრიპტოვალუტებიდან პროცენტის მიღების უფლების მიცემას ეწინააღმდეგებიან, რადგან დეპოზიტორების გადინებისა და რამდენიმე ტრილიონი დოლარის დაკარგვის ეშინიათ.
წყარო: https://www.cryptotimes.io/2026/02/28/morgan-stanley-files-for-crypto-focused-trust-bank-license/
სიახლეების გამოწერა
